[230ra] et d’escuiers qui me savoient recorder justement ce que je demandoie et requeroie a savoir. Si aprins et fu enfourmez la des besoignes de Portingal et de Castille, et comment on s’i estoit porté le temps passé, des guerres, des batailles et des raencontres que ces deux roys et leurs adherens et aidans avoient eu l’un contre l’autre, desquelles choses et besoignes je vous feray juste recorta.
Vous savez, si comme ci dessus est contenu, comment le roy dam Jehan de Castille avoit assegié la bonne cité de Lusebonne, et le roy Jehan de Portingal dedens, le quel roy de fait les bonnes villes de Portingal avoient couronné pour sa vaillance, carb voirement estoit il bastart. Et si avez ouy recorder comment cil roy avoit envoié en Angleterre devers le duc de Lencastre et le conte de Cantebruge, qui avoient par mariage ses cousines, au secoursc, ses especiaulx messaiges deux chevaliers : messire Jehan Radigos et messire Jehan Teste d’Or, et avec eulx un clerc licencié en drois qui estoit arcediacre de Lusebonne. Tant exploitierent ces embassadeurs par mer, par le bon vent qu’ilz eurent, que ilz arriverent ou havre de Hantonne1. Et la issirent ilz de leurs vaisseaux, et se refreschirent en la ville un jour et prindrent la chevaulx, car ilz n’en avoient nulz faiz passer. Et puis chevauchierent tout le grant chemin pour venir a Londres, et tant firent qu’ilz y vindrent. Ce fu ou moys d’aoust, que le roy d’Angleterre2 estoit en la marche de Galles3 en chace et en deduit, et ses trois oncles le duc de Lencastre, le conte de Cantebruge messire Aymont, et messire Thomas le conte de Bouquighem4 estoient aussi chascun en leurs deduis en leurs paÿs. Tant eurent plus a faire les messaiges du roy de Portingal5. Et [230rb] premierement ilz se traïrentd devers le duc de Lencastre qui se tenoit a Harfort6 a .xx. mille de Londres. Le duc les reçut moult doucement, et ouvri les lettres qu’ilz lui baillierent et les lisye par trois foiz pour miex les entendre, et puis respondi et dist :
« Vous soiez li bienvenu en ce païs, mais vous venez aussi mal a point pour avoir hastive delivrance que vous pouyés venir en tout l’an, car le roy et mes freres, et tout le conseil de ce paÿs, sont espars, li un ça et li autre la. Ainsi ne pouez avoir response ne delivrance fors que par l’especial conseil7 de Londres, a la Saint Michiel8 que tout le paÿs se retourne la a Wesmoustier9. Et pour ce que especialment et principalment ceste matiere pour la quele vous venez touche tresgrandement a mon frere et a moy, je en escriray devers lui et ferayf que moy et lui seronsg temprement et briefment a Londres, ou pres de la. Si aurons ensemble conseil et advis comment pour le miex nous en pourrons ordonner. Et vous retournerez a Londres et nous attendrez la. Et quant mon frere sera approchiez, vous orrez nouvelles de nous. »
Les ambassadeurs portingalois furent contens assez de ces responses, et se departirent du duc de Lencastre quant ilz eurent esté avecques lui .j. jour, et retournerent a Londresh, et la se logierent et se tindrent tout aise.
Le duc de Lencastre ne mist pas en oubli ce que il leur avoit dit, mais escripsy tantost devers son frere de Cantebruge lettres especiales sur l’estat que vous avez ouy. Quant le conte eust ces lettres de son frere le duc, si les list a grant loisir. Depuis ne demoura gaires de temps que il s’en vint a Harfort delez le Ware10 ou le duc se tenoit, et la furent trois jours ensemble, et conseillierent ceste besoigne au miex qu’ilz porent, et se ordonnerent de venir vers Londres, si comme le duc de Lencastre l’avoit
- Southampton, port sur la Manche (Hampshire, Angleterre).
- Richard II.
- Région située entre l’Angleterre et le Pays de Galles. Selon ce qui est connu de l’itinéraire du roi dans ces mois, ce que Froissart rapporte ici n’est pas fiable (voir N. Saul, Richard II, Yale University Press [New Haven et Londres, 1997], itinéraires).
- Thomas, comte de Buckingham, oncle de Richard II.
- Jean 1er.
- Hertford, au nord de Londres (Grande-Bretagne).
- Peut-être le conseil privé du roi, ou le Parlement.
- La Saint-Michel (29 septembre, date à laquelle se rassemblait de coutume le Parliament anglais).
- Westminster, à l’ouest de Londres (Grande-Bretagne), où se trouvait le palais royal.
- Ware, non loin de Hertford.