[232ra] car point ne serez combatu jusques a ce que le duc de Lencastre et ses gens soient venu, et par ainsi vous seront chier vendu les gaiges que vous avez prins.
– Monseigneur, respondirent ilz, puisque nous avons esploitié si avant, nous parferonsa le voyage.
– Dieu y ait part ! dist le conte. Or alons disner, il est heure. »
Lors s’en vint le conte avecques ses barons et chevaliers et se mist en la sale ou les tables estoient mises. Si disnerent grandement et a loisir, et furent servis de tout ce que pour le jour appartenoitb.
Aprés disner le conte de Fois emmena les chevaliers en ses galeries, et si comme il avoit d’usaige de ruser et solacierc aprés disner, il entra a eulx en parole, et dist :
« Beaux seigneurs, je vous voy envis partir de mon païs, non pas que je soie courrouciez de vostre avancement et honneur, car en tous estaz je le augmenteroie et exaulceroie volentiers, mais je ay grant pitié de vous, car vous estes toute la fleur de la chevalerie de mon païs de Berne ; si vous en alez en estranges marches et en estranges paÿs guerroier ! Je vous conseille – autre foiz le vous ay je dit – que vous vous deportez de ce voiage, et laissiez le roy d’Espaigne et le roy de Portingal faire leur guerre ensemble, car elle ne vous compete en riensd.
– Monseigneur, respondirent ilz, saulve soit vostre honneur, nous ne pouons pas ainsi faire, et miex savez que vous ne dictes. Se il le vous plaist a entendre, nous avons receuz les gaiges et les dons du roy de Castille, si le nous fault desservir.
– Or, dist le conte, vous parlez bien, mais je vous diray qu’il vous avendra de ce voiage : ou vous retournerez si povre et si nu que les pouls vous estrangleront et les croistrés entre voz onglese… ».
Adonc leur monstra [232rb] comment, a mettre ses deux poces ensemblef,
« ou vous serés ou tous mors ou tous pris. »
Les chevaliers commencierent a rire et dirent :
« Monseigneur, il nous en fault attendre l’aventure ! »
Adonc entra le conte en autres paroles, et laissa cestes en paix, et leur remonstra en parlant la maniere et la nature des Espaignolz, et comment ilz sont ors et pouilleux, et fort envieux sur le bien d’autrui, et que sur ce ilz eussent bon advis et bon conseil. Et quant il ot parlé de pluseurs choses, il demanda vin et espices ; si but, et puis beurent tous ceulx qui la estoient. Lors prinst il congié a eulx, et bailla a chascun la main et commanda a Dieug, et puis rentra en sa chambre. Et li chevalier monterent au pié du chastel, et ja estoient leurs gens et leur harnoiz parti et venu a Sauveterre. Et la vindrent logier ce soir, et l’endemain se departirent et entrerent en la terre des Bascles, et prindrent le chemin de Pampelune, et par touth passoient seurement, car ilz paioient ce que ilz prenoienti.
En ce temps que le roy de Castille seoit devant Lusebonne, et avoit sis ja environ un an, se rebellerent ceulz de la ville de Saint Yrain contre le roy de Castille, et cloïrent leurs portes et distrent que nulz François ne Espaignolz n’entreroient en leur ville, pour les dommaiges et oppressions que on leur faisoit. Et veulent dire les aucuns que ce fu par la coulpe des gens messire Gieufroy Richon et de Gieufroy de Partenay qui menoient routes de Bretons qui prenoient et pilloient quanque ilz trouvoient, et riens ne savoient que c’estoit de paierj. Si se saisirent les citoiens de la ville de deux chasteaulx, et distrent que ilz les tendroient contre tout homme