[233ra] noz filles, rompre noz huches, effondrer noz tonneaux de vin, nous batre et mehaignier quant nous en parlions. Si ne vous devez pas esmerveillier quant nous veons telz oultraiges faire sur nous et sur le nostre de ceulz qui nous deussent gardera, se nous nous en courrouçons, car on se courrouce bien pour moins. Si pourrez dire au roy tout ce, se il vous plaist, mais nous sommes d’un accort : pour homme qui viengne, nous ne requeillerons ne François ne Bretons, fors le corps du roy proprement et ceulx que il lui plaira, sans nous traveillierb ne faire nulle violence. »
Quant messire Regnault Lymosin les ouy parler de tel langaige, si se appaisa, et lui sembla assez que ilz n’avoient pas eu tort se ilz avoient bouté hors leurs ennemis de leur ville. Si leur dist :
« O, bonnes gensc, je vous ay bien ouy et entendu. Vous demourrés en vostre paÿsd et je m’en retourneray en l’ost devers le roy, et lui denonceraye toutes les paroles que vous m’avez dictes. Et en bonne verité je seray pour vous. »
Ceulx respondirent :
« Monseigneur, grant mercis ! Nous nous confions bien en vous que, se le roy est non deuement enformez sur nous, vous nous serés un bon moien. »
A ces motz prinst congié messire Regnault Lymosin et se parti de la ville, et monta a cheval et retourna a ses gens qui l’attendoient sur les champs, et puis chevaucha tant qu’il vint en l’ost devant Lusebonne, et descendi en son logeis et puis ala devers le roy et lui recorda tout ce que il avoit veü et trouvé en ceulx de Saint Yrain. Quant le roy en sçut la verité, si dist :
« Par ma foy, ilz ont fait que saigesf se ilz se sont mis asseur de ces pillars bretonsg. » [233rb]
Orh advint ainsi que, quant Gieuffroy de Partenay et messire Gieufroy Ricon et leurs routes veirent que ilz n’auroient autre chose de ceulx de Saint Yrain, et que le roy de Castille les dissimuloiti, si en furent (si en furent)j durement courrouciez et distrent entr’eulx :
« Nous devons bien avoir laissié le royaume de France et estre venu en ce paÿs servir le roy d’Espaigne quant nous sommes ainsi ravalez des villainsk, et ne nous en veult on faire droit. La chose ne demour[r]a pas ainsi. Il doit venir temprement grant foison de Gascons : nous souffrerons tant qu’ilz seront venus, et puis nous accorderons ensemble, et eulz et nous aiderons a contrevengier de noz compaignons que on nous a occis et meshaigniez. »
Nouvelles vindrent en l’ost au roy et a son conseil que les Bretons menaçoient durement ceulx de Saint Yrain, et se ventoient que, les Gascons venus, ilz leur feroient chier comparer ce que il leur avoient fait. Si fu le roy conseilliez que il se departiroit du siege de Lusebonne et s’en vendroit rafreschir a Saint Yrain et remetroit les choses en bon point et en bon estat, et la attendroit la venue des Gascons, ou bien avoit quatre cens lances de bonnes gens, dont il avoit grant joye, car pas ne vouloit qu’ilz trouvassent le paÿs en trouble. Et aussi grant foison de ses gens se desiroient a rafreschir, car ilz avoient la esté moult longuement sans riens faire. Aprés fu ordonné depar le roy le deslogier et partir toutes gens du siege, et traire vers Saint Irain. Si se deslogierent les Espaignolz, et tous ceulx qui la avoient esté longue saison, et s’en vindrent en la marche de Saint Irain. Quant ceulx de Saint Yrain entendirent que le roy de Castille devoit venir vers leur ville, si se ordonnerent .xij. hommes des plus notables des leur, et monterent