[270ra] tous d’une voix : « “Saint George, Portingal !” », et entrerent les nostres es Castelloings fort et ferme, et les commencierent a desrompre et a abatre l’un ça et l’autre la. La furent abatus vaillamment et mortelment l’un sur l’autre, et feruz de hasches et de plommees et de grans guisarmesa, et tourna du tout la desconfiture sur eulx. Quant leurs pages et leurs varlés qui gardoient leurs chevaulx apperceurent la desconfiture de leurs maistresb, si tournerent en fuite pour eulx sauver. Et sachiez que des sept capitaines qui la furent, il ne s’en parti que un tout seul, encore fut ce par son bon page qui le vint querir en la bataille au dehors ou il le vit, et le fist monterc. Il lui fist pour ce jour un moult beau service, et ce fu Adioutale Caseled. Tous les autres six furent mors, ne onques il n’y ot prins homme a raençon. Ainsi obtindrent la place et desconfirent de rencontre les Castelloings messire Jehan Ferrant Percek et leurs gens, qui estoient largement troise contre deux, assez pres de la ville de Trencouse, en un jour de mercredi ou moys d’octobre en l’an de grace Nostre Seigneur mil trois cens quatre vins et quatre1. »
§ 32.
Comment le dit Laurencien Fougasse racompta au dit duc de Lencastre la bataille qui fu a Juberote entre le roy de Castille et le roy de Portingal.f
« Aprés2 ceste desconfiture faitte et le champ tout delivré, noz gens monterent et donnerent congié aux hommes qui la estoient que les Castelloings avoient prins, si comme je vous ay dit. Et encores leur rendirent ilz du pillaige que ilz emmenoient, tant que ilz en vouldrent prendre, mais le bestail ou plus avoit de .viijc. bestes [270rb] ilz en firent mener devant eulx en la ville et garnison de Trencouseg pour eulx pourvoir et advitaillier ; ce fu raison. Et quant nous rentrasmes en Trencouse nous y feusmes receuzh a tresgrant joie, et ne savoient les gens que ilz peussent faire de nous, pour tant que nous avions delivré la contree de noz ennemis et rescoux ce que perdu estoit. Et le nous tournerent a grant vaillance, et aussi firent tous ceulx des bonnes villes de Portingal qui en oïrent parler. Encores en cel an present ont noz gens bien eu aussi belle journeei et aventure ou champ de Sebille3, mais je vous recorderay avant la plus belle journee et la plus eureuse que le roy de Portingal ait point eu depuis .cc. ans, que nostre roy – le roy Jehan mon tresredoubtéj seigneur qui cy m’envoye – et le grant maistre de Saint Jaqueme qui ci est, a eu depuis quatre moys sur ses ennemis, lesquelz estoient bien .iiij. contre un, et de toutes bonnes gens d’armes et de haulte emprinse, par quoy la nostre journee en est plus recommandee. Mais je croy, Monseigneur, que vous en avez bien oÿ parler, si vault au tant que je m’en taise que j’en parolek.
– Non ferés, dist le duc, vous ne vous en tendrezl pas, vous le me compterez, car je vous oy volentiers parler. Il est bien verité que je ay un varlet a herault céens qui s’appelle D[e]rbi4 qui y fu, ce dist il, et me compta que noz gens de ce païs y firent merveilles, et plus, ce me semble au voir dire, que ilz ne sceussent ou peussent faire, car il n’en y pouoit avoir foison, parce que mon frere de Camtebruge, quant il se parti de Portingal, mist tous hors les Angloiz que il y avoit menez, et les Gascoings aussi. Et de ces heraulx moult en y a qui sont si grant bourdeur et menteurm