[274ra] au retour. Ilz n’eurent pas alé une lieue du païs quant ceulx de la garnison de Valverde vindrent le grant pas sur eulxa, et les conduisoit un moult appert homme d’armes qui s’appelloit Diogenez de Padille1 et grant maistre de Saint Jaque de Galice, et vindrent ferir sur noz gens, lesquelz lors que ilz sentirent l’effroyb mistrent tantost pié a terre et baillierent les chevaulx a leurs pages et a leurs varlés les lancesc; et se recueillirent tous ensemble les Espaignolz qui estoient grant masse et grant assemblee. Tout premier entendirent aux varlés et aux chevaulx prendre, et les orent tous pardevers eulx. Et fu tel fois que ilz disoient :
« “Alons nous ent, si emmenons leurs chevaulx, nous ne les pouons miex grever ne donner plus de peine que d’eulx faire retourner a pié.”
« Adonc dist le grant maistre de Saint Jaque :
« “Nennil, nous ne ferons pas ainsi, car se nous avons les chevaulx, nous aurons les maistres aussi, car nous les combatrons tout a pié. Ilz ne pevent durer a nous. ”
« Or advint, endementres que les Castelloings se detrierent de nous assaillir et que ilz se conseilloient, au derriere de noz gens il y avoit .j. petit ru d’eaued. Ilz le passerent tout bellement et se fortifierente et ne monstrerent nul semblant que riens leur feust de leurs chevaulx. Quant les Castelloings virent noz gens par entre le ruf, si se repentirent trop fort que de venue ilz ne les avoient assailliz et combatus. Nonobstant leur entencion estoit bien tele que ilz y recouvreroientg bien, et que legierement les desconfiroient. Si vindrent sur eulx et commencierent a lancier et getter dardes, et quant [274rb] li Castelloing orent emploié toute leur artillerie et ne savoient mais de quoy lancier ne getter, et furenth en tel estat de nonne jusques au vespre, quant noz gens virent que toute leur artillerie estoit pardevers eulx et que les Casteloings ne se savoient mais de quoy defendre ne combatre, le conte de Novaire fist passer sa baniere oultre le ru et toutes ses gens aussi, et puis au pousseizi des lances ilz se bouterent entre ces Chastelloings, lesquelz ilz ouvrirentj tantost, car ilz estoient lassez, traveilliez et eschauffez en leurs armeures. Si ne se peurent au besoing aidier. La furent ilz desconfiz et tous rüez jus, et le grant maistre mort et plus de soixante des leur, et li demourant tournerent en fuye. La recouvrerent ilz leurs chevaulx, et autres assez que les Castelloings avoient la admenez. Que vous en semble il, Monseigneur ? dist Laurencien. N’orent pas noz gens ce jour une belle aventure ?
– Par ma foy, respondi le duc de Lencastre, ouil. »