[224va] de l’ostel du duc de Lencastre qui pour ce temps se tenoit a Bourdeaulx1, a qui le conte de Fois fist bonne chiere et donna de beaulx dons. Je me accointay desa chevaliers, et par eulx fu je lors enformez de grant foison de besoignes qui estoient advenues en Castille, en Navarre et en Portingalb, desqueles je parleray clerement et plainement quant temps et lieu en sera. La vi venir un escuier gascon qui s’appelloit le Bascot de Maulion2, et pouoit avoir pour lors environ cinquante cinq ansc, appert homme d’armes par semblant et hardi, et descendi en grant arroy en l’ostel ou je estoie logiez a Ortais, a la Lune, surd Ernaulton du Pin3, et faisoit mener sommiers autant comme un grant baron, et estoit servis, lui et ses gens, en vaisselle [d’argent]e. Et quant je l’oÿ nommer et vy que le conte de Fois et chascun lui faisoit grant feste, si demandayf a messire Espaeng de Lion :
« N’est ce pas li escuier qui se parti du chastel de Trigalet quant le duc d’Anjou sist devant Mauvoisin ?
– Oïl, respondi il, c’est un bon homme d’armes pour le present et un grant capitaine. »
Sur ceste parole je m’acointay de li, car il estoit en mon hostel, et m’en aida a accointier un sien cousin gascon du quel j’estoie trop bieng, qui estoit capitaine de Carlac en Auvergne4, qui s’appelloit Ernauton, et aussi fist le bourc de Campane5.
Et ainsi qu’on parole et devise d’armes, une nuit aprés soupper, seant au feu et attendant la mienuit que le conte de Fois devoit soupperh, son cousin le mist en voie de parler et a recorder de sa vie et des armes oui en son temps il avoit esté, tant de pertes comme de proufis6, et trop bien lui en souvenoit. Si me demanda :
« Messirej Jehan, avez vous point en vostre histoire7 ce dont je vous parleray ? »
Je li respondi :
« Je ne sçay, aie ou non aie. Faictes vostre compte, car je vous oy volentiers parler d’armes, [224vb] car il ne me puet pas de tout souvenir, et aussi je ne puis pas avoir esté de tout informez.
– C’est voir, respondi li escuiers. »
A ces motz il commença son compte et dist ainsik :
« La premiere fois que je fu armez, ce fu soubz le captal de Beuckl 8 a la bataille de Poitiers, et de bonne estraine je euz en ce jour trois prisonniers, un chevalier et deux escuiers, qui me rendirent l’un par l’autre troism mil frans. L’autre annee aprés je fu en Pruce9 avecques le conte de Fois et le captal son cousin, de quel charge j’estoie, et a nostre retour a Meaulx en Brye10 nous trouvasmes la duchesce de Normendie11 pour le temps et la duchecce d’Orliens12 et grant foison de dames et de damoiselles, gentilz dames que les Jaquesn 13 avoient encloz ou marchié de Miaulx, et les eussent efforciees et violees se Dieu ne nous eust la envoiez. Bien estoit en leur puissance, car ilz estoient plus de dix mille, et les dames estoient toutes seules. Nouso les delivrasmes de ce peril, car il y ot mors des Jaques sur la place, renversez aux champsp, plus de .vjm., ne oncques puis ne se rebellerent. Pour ce temps estoient trieuves entre le roy de France et le roy d’Angleterre, mais le roy de Navarre faisoit guerre pour sa querelle au regent et au royaume de France. Le conte de Fois retourna en son païs, mais mon maistre le captal demoura avecques et en la compaignie duq roy de Navarre, pour ses deniers et a gaiges. Et lors feusmes nous, avec les aidans que nous avions, ou royaume de France et par especial en Picardie ou nous feismes une forte guerre et preismes moult de villes et de chasteaulx en l’eveschié de Biauvais et en l’eveschié d’Amiens, et estions pour lors tous seigneurs des champs et des rivieres, et y conqueris–
- Jean, duc de Lancaster était en effet lieutenant du roi d’Angleterre en Aquitaine à cette époque.
- Le Bascot de Mauléon, capitaine de compagnie.
- Cette expression semblerait confirmer qu’Arnauton du Pin était bel et bien propriétaire de l’ostel a la Lune. Voir la photo hors texte de Didier Sorbé : « C’est à l’auberge à l’enseigne de la Lune que Froissart descendit à Orthez ; le bâtiment a été remanié aux XV-XVIe siècles » (Cahier 1, p. 32, numéro 1, dans Tucoo-Chala (1994).
- Carlat, canton de Vic (Cantal), ville fortifiée.
- Garcie-Arnaut, Bourc de Caupenne (Landes), capitaine de compagnie, cousin du Bascot de Mauléon.
- Les vicissitudes de la guerre.
- Froissart nous indique ainsi que sa réputation de chroniqueur et historien fut désormais assurée, même dans le Midi. Nous sommes témoins aussi, dans cette conversation, de ses méthodes de travail.
- Jean de Grailly, Gascon, Captal de Buch, l’un des plus grands capitaines de l’époque, présent aux batailles de Poitiers et de Nájera. † 1376.
- La Prusse. Référence aux croisades des chevaliers teutoniques en 1357-58.
- Meaux, sur la Marne, chef-lieu d’arrondissement (Seine-et Marne) ; événement qui eut lieu le 9 juin 1358.
- Jeanne de Bourbon, femme de Charles qui deviendrait roi en 1364 sous le nom de Charles V.
- Blanche de France épousa Philippe d’Orléans en 1344. † 1392.
- Ceux qui participèrent à la Jacquerie ou Grande Révolte (mai-juin 1358). Voir l’article « Révoltes populaires » que signe Claude Gauvard dans DMA, 1206-09. Voir aussi, pour les révoltes populaires en Angleterre en 1381, Juliet Barker, England, arise. The People, the King & the Great Revolt of 1381, Little, Brown (Londres, 2014).