[233va] a cheval et s’en vindrent sur les champs et chevauchierent tant qu’ilz encontrerent et trouverent le roy, pour savoir plus proprement le courage et la volenté de li, le quel estoit descendus en un grant ombre dessoubz oliviers pour lui rafreschir, car il faisoit grant chaleur, a deux heures pres de Saint Yraina. La estoit messire Regnault Lymosin, mareschal de l’ost, qui estoit tout pourveuz de leur venue et estoit present delez le roy. Et cilz venus devant li, se mistrent a genoulz et lui distrent ainsib :
« Tres redoubtéc sire et noble roy de Castille, nous sommes ci envoiez depar la povre communaulté de vostre bonne ville et chastellerie1 de Saint Irain, car on leur a donné a entendre que vous estes grandement courrouciez sur eulx, et se ainsi est ou soit, tres redoubté sires, la coulpe et offence ne vient pas par eulx, mais par les grans injures et opressions que les Bretons leur ont faiz, lesquelz estoientd en leur ville et la vostre premierement, car tous leurs malings et mauvais faize ne pevent pasf estre venu tous a congnoissance, mais pas n’en encoulpons leurs maistres – chevaliers, escuiers ne capitaines – fors ceulx qui les ont faiz et perpetrez. Si ont tant fait li pillars bretons que merveilles seroit a penser ne a recorder, et nous ont tenu (un tenu)g un temps en grant subgeccionh en la dicte ville et en la chastellerie, dont pluseurs plaintes en venoient a nous. Et en despit de ce, yceulx pillars rompoient noz coffres a force de hasches et prenoient tout le nostre, et violoient noz femmes et noz filles, presens nousi. Et quant nous en parlions, nous estions batus et mehaigniez, ou morsj. En celle povreté avons nous esté deux moys et plus, pourquoy, tresredoubté seigneur et noble roy, nous vous supplions, se nous vous avons courroucié par celle cause ou [233vb] autrement, a fairek juste et loyal informacion de nous, et nous mener par voie de droit, si comme vous nous promeistes et jurastesl a tenir enterinement et franchement, quant vous entrastes premierement roy en la ville de Saint Irain, et la seigneurie et possession vous en fu baillie ; et vous ferez aumosne, car puisque vous y venez, nous adjoustons en vous et en vostre conseil tant de noblesce et de franchise que la ville sera – et trouverez – toute ouverte a vostre venue. Et a vostre povre peuple qui crie mercis des injures et oppressions que on leur a faiz, se vostre majesté royal et vostre noble conseil le dit, vueilliez donner grace et remission. »
Le roy se teust un petit, et messire Regnault Lymosin parla, et dist en lui agenouillant devant le roy :
« Treschier sires, vous avez ouy vostre povre peuple de Saint Irain complaindre et demonstrer ce que on leur avoit fait ; si en vueilliez respondrem.
– Regnault, dist li roys, nous savons bien qu’ilz ont juste causen. Dictes leur que ilz se lievent et s’en voisent devant a Saint Yrain appareillier pour nous, car nous y serons en nuit au giste, et au seurplus ilz seront bien gardez en leur droit. »
Messire Regnault Lymosin se leva lors et se retourna devers ceulx de Saint Irain, et leur dist :
« Bonnes gens, levez vous. Le roy messire a bien entendu et conceuo ce que vous avez dit. Vous ne voulez que droit et justice, et il la vous fera et tendra. Et apparilliez deuement a sa venue la ville de Saint Yrain, et faictes tant qu’il vous en sache gré, car les choses vendront a bien, parmi les bons moyens que vous aurez en vostre aidep.
– Monseigneur, respondirent ilz, grant mercis. »
Lors prindrent ilz congié du roy et monterent a cheval, et s’en retour–