247v

[247va] que li chevaliers distrent entr’eulz :

« Vela un escuier de grant volenté et au quel les armes sont bien seans, car il s’en scet moult bien aidier et avoir^a. Ce seroit bon^b de traittier de­vers lui que il rendisist le fort et s’en alast ailleurs pourchacier. Et li soit dit que se messire Gautier de Pasac le conquiert en assaillant, nul ne le pourroit delivrer de ses mains que il ne feust mort^c, car il a juré que tous ceulx que a force on prendra, ilz seront mors ou pendus. »

Adonc en fu chargiez depar le seneschal de Thoulouse un escuier de Gascoigne qui s’appelloit Guillaume Lidiel¹, qui bien congnoissoit Ernau­ton, car pluseurs foiz ilz s’estoient armez et portez compaignie ensemble, que il voulsist a lui parler. Il le fist tres volentiers, car envis eust veü que l’es­cuier eust receu nul dommaige tant que de mort, sauve son honneur, ou il eust eu pouoir du reme­dier. Cil Guillaume Alidiel vint tout devant a l’as­sault et fist signe a Ernauton que il vouloit parler a lui pour son grant proufit. Ernauton re­spondi que bien lui plaisoit. Lors se cessa l’assault de celle part, car tousjours assailloit on a l’autre part. Si dist Guillaume a Ernauton :

« Il vous va trop grandement bien. Les sei­gneurs m’envoient devers vous et ont pitié de vous, car se vous estes prins par force, c’est l’ordonnance de nostre souverain capitaine mes­sire Gautier de Pasac que vous soiez mort sans nul remede, si comme ont esté ceulx de Sorget^d. Si vous vault trop miex a rendre le fort, et je le vous conseille, que d’attendre celle aventure, car bien sachiez veritablement, car point ne partirons de ci, si l’arons^e. »

Lors dist Ernauton :

« Guillaume, je sçay bien, combien que a present vous soiez armé [247vb] contre moy, que vous ne me conseilleriez chose qui feust a mon deshonneur, mais sachiez que se je vous rens le fort, tous ceulx qui ci dedens sont avecques moy s’en partiront aussi sain et sauf, et arons tout le nostre que porter en pourrons, horsmis les pour­veances. Et nous fera on conduire sauvement et sainement jusques au chastel de Lourde. »

Ce dist Guillaume Alidiel :

« Je n’en sui pas chargiez si avant, mais je parleray volentiers pour vous a messeigneurs^f. »

A ces motz retourna il devers le seneschal de Thoulouse, et lui recorda toutes les paroles que vous avez oÿes. Ce dist messire Hugues de Froi­deville :

« Alons parler a messire Gautier. Encores ne sçay je quel chose il vouldra faire, combien que j’aie mené le traittié^g si avant, mais je croy que nous lui ferons faire. »

Adonc s’en vindrent ilz devers messire Gau­tier qui faisoit assaillir a une part moult destroi­tement et asprement, et li ala dire ainsi [messire Hugues] :

« Messire Gautier, j’ay fait traictier devers le capitaine de ce fort. Il est en bonne volenté de nous rendre la garnison ainsi comme elle est, mais il s’en veult – et tous ceulx qui la dedens sont – partir quictement et sauvement, et estre conduiz jusques a Lourde ; avecques tout ce ilz en veulent porter tout ce que porter en pourront devant eulx. Or regardez que vous en voulez faire ; nous per­drions ja plus se uns de noz chevaliers ou escuiers d’onneur estoient mors d’un trait ou d’un giet de pierre ou par aucun autre accident perilleux, et plus vous annuieroit que vous n’ariez de proufit a eulx mettre a mort, quant prins

1. Peut-être Guillaume Aluder.