[269va] Adioutale de Thoulete respondi ainsi et dist qu’ilz y pouoient bien chevauchier ainsi comme ilz vouloient pour punir les desobeissans, car il leur estoit commandé de leur seigneur le roy de Castille, au quel l’eritaige de Portingal appartenoit. Et pour tant qu’ilz y avoient trouvé rebelles et desobeissans, ilz avoient couru ou païs et levé proie, et emmenoient prisonniers.
« “Vous ne les menrez pas trop loing, respondi Jehan Ferrant Percek, ne la proye aussi, car nous les vous secourronsa; ne nul droit vous n’avez en ce païs de venir courir. Ne savez vous pas que nous avons roy le quel veult tenir en droit son royaume et garder justice et punir les larrons et pillarsb ? Si vous disons depar lui que tout ce que vous avez prins et levé ou royaume de Portingal, vous remettez arriere, ou autrement sur nostre droit et juste querelle nous nous combatrons a vous.”
« Dont respondi Adioutale de Thoulete :
« “Les prisonniers que nous avons ne rendrons nous pas, mais nous nous conseillerons de la proiec.”
« Lors se sont les .vij. capitaines de Casteloingned trait ensemble en conseil, et monstrerent a ce que ilz respondirent que pour celle foiz, quoyque ilz eussent chevauchié devant Trencouse, ils se feussent bien passez de la bataille, car ilz distrent, eulx conseilliez, que le bestail que ilz menoient et tout le sommagee excepté les hommes que pour prisonniers ilz tenoient, ilz mettroient et laisseroient ariere, et n’en faisoient compte du mener, car ce les chargoit trop.
« “Nennil, respondirent les Portingalois, nous ne nous en passerons pas ainsi, mais voulons que tout vous laissiez, ou vous aurez la bataille.”
« Monseigneur, ilz ne se peurent concorderf. Si commença la bataille entr’eulx dure et fiere, sans [269vb] eulx espargnier, car ilz estoient tous legiers et fortes gens, et le champ ou ilz se combatoient estoit beaux et plaing. La lançoient et gettoient Portingalois et Espaignolz l’un a l’autre les coups deh darde si grans et si fors que qui en estoit assenez, il estoit trop a certes bien armez se il n’estoit mors ou navrez trop durement. La ot fait, je vous di, pluseurs grans appertises d’armes et de abateis par belles luites, et la estoit Jehan Ferrant Percek qui d’une hache se combatoit moult vaillamment, et aussi firent ses deux compaignons Martin Vas de Coigne et Guillaume de Coigne. D’autre part li Espaignolz se combatoient aussi moult vaillamment, et dura l’estour et le pousseis plus de trois heures sans bransler l’une partie ne l’autre, et estoit a esmerveillier comment ilz peurent tant souffrir la paine d’estre en leurs armeures, mais le grant desir que chascun avoit de partir a honneur de la place les faisoit telz estre1, et si vous di aussi que Portingalois et Espaignolz sont dures gens aux armes, et autre part quant ilz voient que le besoing touchei. Ilz furent en tel estat, lançant et jettant dardes et poussant l’un sur l’autre moult longuement que on ne savoit a dire ou sceust, qui les veist en cel estat combatre, lesquelz auroient le meilleur, ne lesquelz obtenroient terre ou place pour la journee, tant se combatoient bien et egalment, ne onques – Dieu merci – baniere ne pennon de nostre costé cheÿ ne versa, mais les leur se commencierent a desrompre et a bransler, donc se rencouragierent li nostre et furent plus fres que devant, et escrierent hault