Charles de Blois, qui s’appelloit
duc de Bretaigne,
qui avoit esté pris devant
La Roche Darian, ainsi comme cy dessus est
recordé et contenu. Si fut mis en courtoise prison dedens le
chastel de Londres
avecques le
roy David d’Escoce et le conte de Mouret. Mais il n’y ot pas
esté longuement quant ala priere de
madame la royne d’Angleterre, sa cousine germaine, il fut receu sur sa foy et chevauchoit a sa voulenté autour de
Londres.
Mais il ne pouoit gesir dehors que une nuit, s’il n’estoit en la compaignié du
roy
d’Angleterre ou de la
royne.
¶ En ce temps estoit prisonnier en
Angleterre le conte d’Eu, le conte de Guines, mais il estoit si frisque et si jolis chevalier et si bien lui advenoit a
faire quanque il faisoit qu’il estoit par tout le bien venu du roy et de la
royne et des barons, des chevaliers, des dames et des damoiselles.
SHF 1-315 sync
Comment Bacon le brigant gaingna le fort chastel de Combourne et
de Crokac et aussi de plusieurs autres brigans qui couroient lors
parmy le royaume de France.
Toute celle annee que celle treve fut accordee que vous avéz ouy, se tindrent les
deux roys a paix contre l’un l’autre. Mais pour ce ne demouroit mie
que
messire Guillaume de Douglas, ce vaillant chevalier d’Escoce, et les
Escocs qui se tenoient en la
forest de Gedours, ne guerroiassent tousjours
les
Anglois par tout ou ilz les pouoient trouver, quoyque le
roy
d’Escoce, leur sire, feust pris. Et ne tindrent oncques treves que le
roy de France et le
roy d’Angleterre eussent ensemble.
¶ D’autre part aussi ceulx qui estoient en
Gascongne, en
Poitou, en
Xanctonge, tant de
François comme de
Anglois, ne
tindrent oncques fermement ne treves ne respit qui feust
entre les
deux roys. Ains gaingnoient et conqueroient villes et fors
chasteaux et sonnent les ungs sur les autres par force ou parpourchas ou par embler ou par
escheler de nuit ou de jour. Et tousjours gaingnoient povres brigans a desrober, embler et
pillés les villes et les chasteaux. Et si
conquirent si grant avoir que c’estoit merveilles. Et devenoient les aucuns si riches, ceulx qui
se faisoient maistres et cappitaines des autres brigans qu’il en y avoit de telz qui avoient bien
la finance de cinquante mil escus. Au voir dire et raconter, c’estoit grant
merveille de ce qu’ilz faisoient. Ilz espioient telle fois une bonne ville ou ung fort chastel une
journee ou deux loings et puis si s’assembloient XX ou XXX brigans et s’en aloient par voies couvertes, tant de jour comme de nuit, qu’il
entroient en celle ville ou chastel que espie avoient droit sur le point du jour et boutoient le
feu en une maison ou en deux et ceulx de la ville cuidoient que ce feussent mille armeures de fer qui voulsissent ardoir la ville. Si s’en fuioient que
mieulx mieulx, et les brigans brisoient maisons, coffres et escrins et prenoient quanqu’il
trouvoient. Puis s’en aloient leur chemin, chargiéz de pillaige. Ainsi firent ilz adonc Senok et
en plusieurs autres villes et gaingnerent ainsi plusieurs chasteaux et puis les revendoient.
¶ Entre les autres ot ung brigant en
Languedoc qui en telle
maniere advisa et espia le
fort chastel de Combourne, qui siet en Limosin et en tres fort
païs durement. Si
pb 153 v