Quant les
François furent ainsi enclos, les
Anglois se mistrent en
ordonnance et partirent du
chastel et se recueillirent en la place devant le
chastel et quant ilz furent tous ensemble, ilz monterent sur leurs chevaulx. Car bien
savoient que les
François avoient les leurs. Et mistrent leurs archiers tout
devant eulx et se trahirent en celluy arroy devers la Porte de Boulongne. La
estoit le dit
messire Geuffroy de Chargny, sa baniere devant luy de gueules a trois escuçons d’argent et avoit grant desir de entrer le premier. Et de ce que on ne ouvroit la porte si longuement, il avoit grant merveille.
Car il voulsist bien avoir plus tost fait. Et disoit aux chevaliers qui deléz luy estoient que ce
Lombart l’a fait longue : "Il nous fait cy mourir de froit." "En nom
Dieu," dist
messire Pepin de Wastre, "sire,
Lombars sont malicieuses gens. Il regarde a vos florins se il en y a nulz faux et, espoir aussi,
se ilz y sont tous." Ainsi se bourdoient et jangloient la les chevaliers, l’un a l’autre. Mais
il oïrent tantost autres nouvelles, car veéz cy venir dessoubz la baniere
messire Gaultier
de Manny le
roy et
son filz deléz luy, et aussi autres banieres, du
conte de Stanfort et
messire Jehan de Montagu, frere au conte de Sallebrin, du seigneur de Beauchamp, du
seigneur de Bercler, du
seigneur de Ware. Tous iceulx estoient barons a banieres. Et plus n’en y ot pour celle
journee. Si fut tantost la grant porte ouverte arriere et issirent les dessus diz tous hors. Quant
les
François les oïrent venir et ilz oïrent escrier :
Manny, a la rescousse !,
ilz virent bien qu’ilz estoient trahis. La dits
messire Geuffroy de Chargny une haulte parolle a
messire Eustace de
Ribenmont et a
messire Jehan de Landas, qui n’estoient mie trop loing de luy :
"Seigneurs, le fuir ne nous vault riens. Et se nous fuions, nous sommes perdus
davantaige. Mieulx vault que nous nous deffendons de bonne voulenté contre ceulx qui
viennent que en fuiant comme vaches et recreuz nous serions pris et desconfis. Espoir fera la
journee pour nous !" "Par
saint Denis", respondirent les chevaliers, "vous dictes voir ! Et mal ai qui fuira." Lors se recueillirent tous ces
compaignons et se mistrent a pié. Et chacierent leurs chevaulx en voie, car ilz les sentoient
trop fouléz. Quant le
roy d’Angleterre les vit fere ainsi, si fist tantost arrester sa
baniere soubz qui il estoit et dist : "Je me vueil adrecier et combattre. On face la plus
grant partie de nos gens traire avant sur la riviere et le
Pont de Milais, car j’ay entendu qu’il en y a la
grant foison a pié et a cheval." Tout ainsi que le
roy ordonna, fut fait. Si se
departirent de sa route jusques a six banieres et deux cens
archiers et s’en vindrent vers le
Milais
que
messire Moreau de Fiennes et le sire de Cresecques gardoient et
estoient les arbalestriers de
Saint Omer entre
Calais et ce pont, lesquelz orent ce premier rencontre. Et y ot occis sur la place que noiéz plus VI vins, car ilz furent tantost desconfis et chaciéz
jusques a la rivere. Car il estoit encores moult matin et
pb 156 r