que autre en feust plus prochain de
moy, je ne seroie point rebelle ne hon
teux du deporter." ¶ Quant le roy
entendy ce, si lui dist: "Sire conte, vous
en dites asséz, mais je vous commande,
sur quanque vous tenéz de moy et que
tenir en devéz, que vous ne vous departéz
de la cité de Paris avant quinze jours,
tant que les barons et les pers aient
jugié de ceste prochaineté. Si pourréz
lors savoir quel droit vous y pouéz et
devéz avoir. Et s’autrement le faites,
sachiéz que vous me courrouceréz". Si
respondit le conte: "Sire, a vostre voulenté." Et
se partit a tant du roy et vint en son
hostel pour disner. ¶ Quant il fut
venu en son hostel, il entra en sa chambre
et commença a penser que, s’il attendoit
le jugement des barons des France et
des pers, qu’il pourroit bien tourner
contre lui, car il lui sembloit que le
roy feroit plus voulentiers partie pour
messire Charles de Blois son nepveu
que pour lui. Et si veoit bien que, se il
avoit jugement contre lui, le roy le
feroit arrester jusques a tant qu’il
eust rendues les villes, chasteaulx et
citéz dont il tenoit la possession, et
avec tout ce, tout le tresor qu’il avoit
trouvé et despendu. Si lui fut avis,
pour le moins mal, que mieulx lui
valut qu’il courrouçast le roy et s’en
ralast paisiblement en Bretaigne,
que il demourast a Paris en ce dan
gier et peril. Tout ainsi qu’il le pensoit,
ainsi fut fait. Car il monta si celeement
et si paisiblement a cheval et se partit
a si petite compaignie, qu’il fut ainçois
en Bretaigne que le roy ne autres, fors
ceulx de son hostel, sceussent riens de
son departement. Ains pensoit chascun