Online Froissart
Home  |  Navigate  |  Apparatus  |  Search  |  About the Edition  |  About the Project  |  Help
Facsimile mode    Settings    Browse  |  Collate      
Navigate | Close
Preferences
Show Page Image
Besançon 865
Codicological description
Previous | Folio 32 v | Next
pb 32 v

le bastart messires Hugue Broe, messire Gieuf
froy Oursellee, messire Thomas West, le sei
gneur de Sainct More, David Hollegrave,
Huguelin de Cavrelee, bastart, Bernard
de Cederieres et pluseurs autres, si chevau
choient ces gens d’armes en bonne ordon
nance et en grant arroy, et n’alerent le
jour que ilz yssirent de Calays plus avant
que a Marquigne et la arresterent pour
entendre a leurs besoingnes et a avoir
conseil entr’eulx lesquelz chemins ils
tendroyent pour accomplir a leur certain
pouoir leur voyaige. Car il en y avoit
pluseurs en la route qui oncques mais
n’avoient esté en France especiaulment
le filz du roy et pluseurs barons et chevaliers.
Si estoit bien chose raysonnable que ceulx
qui congnoissoient le paÿs et royaume
et qui autresfoiz l’avoient passé et chevau
chié, eussent cel advis et gouvernement
que a leur honneur ils l’acompleyssent.
Voirs est que quant les Anglois du temps
passé sont venu en France, ilz ont eu telle
ordonnance entre eulx que les cappitaines
juroyent en la main du roy d’Angleterre
et de son conseil deux choses, elles sont telles
que a creature du monde fors entre eulx,
ilz ne reveleroyent leurs secréz ne leur
voyaige, ne la ou ilz tendent a aler. La se
conde chose est que ilz ne pueent faire
nul traittié a leurs ennemis sans le sceu
et voulenté du roy et de son conseil.
SHF 2-142 sync Quant ces barons, chevaliers et escuiers
et leurs gens se furent reposé et
arresté a Marquigne trois jours et que
tous furent venu et yssu de Calays qui
ou voyaige devoyent aler et que les cap
pitaines ourent advisié a leur besoingne
et quel chemin ilz tenroyent au quatriesme
jour ilz se partirent et mistrent au che

min en tresbonne ordonnance et passe
rent tout pardevant Arde, et la boute
rent hors leurs bannieres les deux
contes, le conte d’Escaufort, le conte
de Dunestre, et arresta tout l’ost devant
la bastide d’Arde pour eulx monstrer
aulx gens d’armes qui dedens estoyent,
et la fut fait chevalier du conte de Bouqui
ghem, le conte de Dunestre et le sire de
Morlas, et mistrent ces deux seigneurs
la premierement hors leurs bannieres.
Encores fist la le conte de Boukinghem
chevaliers ceulx qui s’ensuivent, le filz du
seigneur Fil Watier, messire Rogier de
Stragne, messire Jehan d’Yppre, messire
Jehan Colle, messire Jame de Citelee, messire
Thomas Roumescon, messire Jehan de
Neufville, messire Thomas Roselee et
vint l’ost gesir a Hosque sus une moult
belle riviere, et furent faiz cilz chevaliers nou
veaulx pour la cause de ce que ceulx
de l’avangarde s’en alerent ce jour par
devers une forte maison seant sur la
riviere que on disoit Flolant ou dedens
avoit un escuier a qui la maison apparte
noit que on clamoit Robert. Cilz escuiers
estoit bon homme d’armes. Sy avoit gar
nie et pourveu sa maison de bons com
paignons que il avoit pris et recueillis
la environ et estoyent environ XL et
monstrerent bon semblant d’eulx def
fendre. Cilz barons et cil chevalier en leur nou
velle chevallerie vindrent jusques a la
et puis environnerent la tour de Flo
lant et la commencierent a assaillir de
grant voulenté, et ceulx qui dedens estoi
ent, a eulx deffendre. La ot fait par
assault mainte belle appertise d’armes
et trayoient ceulx du fort moult aspre
ment, dont ilz navrerent et blecierent aucuns des assaillanspb 33 r