de Portingal ot conseil que les chaste
aulx de Saint Yrain qui estoyent l’un
a un cousté de la ville et l’autre d’autre
cousté ilz feroyent assaillir. Car pour
honneur ilz ne pouoient passer par la
sans faire armes. Car les chastellains
avoient ja conquis sur eulx la ville et
les chasteaulx. Sy vouloyent essayer
se ilz les raroyent. Or avoient ilz adme
né avecques eulx engins du Port, car
ilz sçavoient bien que ilz feroient des
assaulx en leur chemin.
Or se logierent le roy de Portingal
et ses gens en la marche de Saint
Yrain, c’est l’entree de Castille, tout au lonc
de la riviere de Pese qui va a Sebille la
Grant. Par celle riviere pouoient bien
venir en l’ost parmy mer, feust de Lusce
bonne ou du Port, grans biens, qainsi que
ilz firent, car grant besoing en avoient.
Car ilz estoient grant gent, plus de XXX
mille d’uns et d’autres. Le connestable
assist luy et sa route a la moittié de la com
munaulté de Portingal le chastel devers
souleil levant que on disoit a La Perrade,
et l’autre chastel de souleil couschant as
sistrent le connestable, le mareschal et
sa route, et l’appelloit on ou paÿs Taillidon.
Du chastel de La Perrade estoit cappitaine
un chevalier de Bretaigne qui s’appelloit mes
sire Mourises Fouchans, appert homme
d’armes, et du chastel Taillidon messire
Jaques de Montmerle un chevalier de Poitou.
Et avoient chascun avecques eulx cinquan
te lances de bons compaignons. Si furent
la bien XV jours et plus, que riens n’y
firent, et estoient engins dreciéz audevant
qui gettoient bien dix ou douze foiz le
jour contre les murs grosses pierres,
mais petit les empiroient excepté le cou
vertures des tours qui furent rompues