Online Froissart
Home  |  Navigate  |  Apparatus  |  Search  |  About the Edition  |  About the Project  |  Help
Facsimile mode    Settings    Browse  |  Collate      
Navigate | Close
Preferences
Show Page Image
Besançon 865
Codicological description
Previous | Folio 357 r | Next
pb 357 r

portéz nostre banniere et noz armes toutes
plaines en la fourme et maniere que
nous les portons par quoy vous aréz
plus de gens de vostre accord. Et pugnis
siéz les rebelles qui obeyr ne vouldront
a vous, tellement que les autres y pren
nent exemple. Je croy bien que quant on
verra noz bannieres que toutes manie
res de gens se mettront dessoubz et se
doubteront de meffaire ou d’estre meffait."
Ceste parolle resjouy grandement le
duc d’Irlande. Comment le roy fist son man
dement es parties de Brisco pour aler
a Londres et comment messire Robert Tri
villien chevalier du dit roy fut prins a
Wesmoustier et descollé depar les
oncles et le conseil du roy.
Or fist le roy son mandement par
my la terre de Brisco et de Galles et
sus la riviere de Saverne. Et plusieurs barons,
chevaliers et escuiers furent du roy man
déz qui s’escusoient et faisoient le malade,
et les aucuns qui se doubtoient de meffaire
venoient devers le roy et se mettoient
en son obeyssance si comme a leur seigneur. SHF 3-192 sync
Endementres que ce mandement et ces
assemblees se faisoient, le roy d’Angle
terre et le duc d’Irlande eurent entr’eulx
deux un conseil bien estroit, et leur
vint en ymaginacion que ce seroit bon
que ilz envoiassent devant un feal et
certain homme des leurs en la marche
de Londres pour sçavoir comment on
s’i maintenoit et se les oncles du roy
s’i tenoient et quelle chose on y faisoit
ne disoit. Tout consideré, on n’y sçavoit
qui envoier pour bien faire la besoingne
et pour faire juste enqueste. Adonc
s’avança un chevalier cousin au duc d’Irlande
et de la chambre du roy, et s’appelloit messire
Robert Trivilien. Et dist au duc: "je vous voy

en dangier de trouver homme feable qui voise
en la marche de Londres. Je me presente que
je yray voulentiers." De ceste parolle luy sceut
le duc d’Irlande grant gre, et aussi fist le roy.
Il se departy de Brisco en abit d’un povre
marchat et monté sus une basse haguenee,
et tant chevaucha qu’il vint a Londres et
se loga en un hostel descongneu. Jamaiz on
ne se feust donné de garde que ce feust Trivil
lien, un des chevaliers du roy, car il n’estoit pas
en habit d’omme de bien fors que d’un villain.
Ce jour qu’il fut a Londres il aprinst moult
de nouvelles du duc de Glocestre et de son
conseil et de celluy des Londriens, voire ce
que on en pouoit savoir, non autre cho
se. Et entendi que a Wesmoustier devoit
avoir un secret parlement des oncles du
roy et du nouvel conseil d’Angleterre. Si
se advisa que il yroit celle part et se ten
droit en la ville de Wesmoustier et la appren
droit tout secretement quelle chose ad ce parle
ment seroit fait ne dit. Il ne deffailly pas
de son propos mais le suivy au plus pres
qu’il pot et s’en vint a Wesmoustier ad ce
jour que le parlement estoit au palais
du roy et se bouta en un hostel devant la
porte du palais, la ou on vendoit servoise.
Et monta en une loge et s’appuia a une
fenestre qui regardoit en la court du pa
lays et la se tint moult longuement et ve
oit les alans et les retournans desquelz il con
gnoissoit grant foyson, mais point n’estoit
congneu. Tant se tint la une foiz regar
dant dedens l’entree que un escuier du duc
de Glocestre et lequel le congnoissoit trop
bien, car plusieurs foiz avoit esté en sa com
paignie, vint d’aventure devant cel hostel
et gette ses yeulx et voit messire Robert. Et
quant messire Robert le vit plainement, tost
le recongneut et retraist tantost son viaire
dedens la fenestre. L’escuier entra en grant pb 357 v