cheÿ la tout mort.
Aynmerigot et
ses compaignons se hasterent et
vindrent a la porte et entrerent ou
guichet, si trouverent le portier la
mort et
sa femme emprés luy moult
esbahie, a laquelle ilz ne firent nul
mal, mais luy
demanderent ou le
chastellain estoit. Elle leur respondi
qu’il estoit en
Clermont. Les compaignons
assegurerent la femme de sa vie,
affin
qu’elle leur baillast les clefz du leans
et de la maistre tour. Elle le fist, car
en
elle n’avoit point de deffense. Et
puis la misrent dehors et lui rendirent
toutes ses
choses, voire ce que porter en
peult. Si s’en vint a
Saint Flour, une
cité a une lieue de la. Si furent ceulx de
Saint Flour moult esbahiz, quant
ilz sceurent que
Aloise estoit angloise,
et ainsi furent ceulx du paÿs
environ.
Asséz tost aprés
Aynmerigot Marcel reprist le
fort chastel de Vallon et
l’embla par eschiellement, et quant
il fut dedens, le
capitaine dormoit
en la grosse tour qui n’estoit mie a
prendre de force, car
par celle tour se
pouoit tout le chastel recouvrer.
Adont se advisa Aymerigot de ung
soubtil tour, car il tenoit le pere et
la mere du capitaine, si les amena
devant la tour et leur fist samblant qu’il
les feroit la decoler, se
leur filz ne
rendoit la tour. Les deux vieilles gens
doubterent la mort, si dirent a leur
filz qui estoit en la tour, que il luy
presist
pitié d’eulx, et plouroient l’un
et l’autre moult fondamment. Adont
le
chastellain se ratenry fort
et n’euist jamais son pere ne sa mere
laissiéz decoler, pourquoy il rendy
la tour, et on les bouta hors
du chastel. Ainsi fut
Valon angloise
qui moult greva le paÿs, car
toutes
manieres de gens qui voloient
mal faire, se retraioient ou a Calusel,
a deux lieues de
Limoges, ou en
Carlac ou en
Aloise ou en
Ventadour ou en
plusieurs autres chasteaulx. Et
quant ces garnisons se assembloient,
ilz pouoient bien
estre cinq ou six cens
lances et couroient tout le paÿs
et
la terre au conte dalphin quy leur
estoit voisine, ne nulz ne leur aloit
au
devant tant que ilz fuissent
ensamble. Bien est verités que le
sire d’Achier
leur estoit ung grant
ennemy. Aussi estoient le seigneur
de Sollerel et le
bastart de Sollerel,
son frere, et ung escuier de Bourbonnoiz
nommé
Gourdinet. Ce
Gourdinet, par
beau fait d’armes et d’un rencontre,
prist ung jour
Aynmerigot Marcel et le raenchonna a cinc mille
frans, tant en eut il. Ainsi se
portoient les fait d’armes en
Auviergne et en
Limosin et ens es marces par de dela.
SHF 2-96 sync
Comment pape Urbain se entendoit
mal avecques les cardinaulx, de la election de maistre Robert de Jeneve, et du tourble et et maulx qui en advindrent en la Crestienté. Le chapitre C IIIIXX IXe.
pb 164 r