Pierre Percek et messire Jean Ferrant Percek et Agalop Ferrant Percek, son frere, qui la estoient au frain du roy; le Pouvasse de Coingne, Egeas Coille, le Podich d’Assue, Vasse Martin de Merlo, et son fils Vasse Martin (mais il moru la ce jour, car il fut feru du get d’une darde tout parmy le corps); item Gonsalves de Merlo, Alve Perriere, mareschal de l’ost et bon chevallier, Jehan Radigos Perriere, Jehan Jame de Salves, Jehan Radigo de Sars, damp Ferrant Radigo, cousin du roy, damp Mondesque Radigo, Radiges de Valeronciaulx, Ruy Mendigés de Valconsiaulx." Lors commença le duc de Lancastre a rire, et Laurentien Fougasse demanda: "Monseigneur, pourquoy ryés vous?" "Pourquoy?" dist le duc; "il y a bien cause. Je ne oys oncques mais nommer tant de fors noms, ne si estranges, comme je vous oÿ cy nommer." "Par ma foy," respondi Laurentien, "tous tels noms courent ils en nostre paiis, et plus d’estranges assés s’en y treuve." "Je vous en croy bien," dist le duc; "or me dittes, Laurentien, se il vous plaist, que devint le roy de Castille aprés ceste desconfiture? Fist il nulle recouvrance? S’enferma il point en aucune de ses bonnes villes? Le roy de Portingal le sieuvyt il point a l’endemain?" "Monseigneur, nennyl. Nous demourasmes celle nuyt sur pb 113 v