damoiselles yssirent hors pour euls raffreschir. Ce premier jour ils n’entendirent point a assaillir fors a euls mettre a point et logier euls sur terre, ou ils furent par trois ou par quatre jours, et tendirent les aucuns des seigneurs tentes et pavillons sur les champs contreval le havre assés pres de la mer et du chastel de Brest, et la se tindrent tout le jour et la nuit aussi. ¶ Quant ce vint a l’endemain, le connestable et le mareschal del host firent sonner les trompettes en signe que on: s’armast et meist en ordonnance pour assaillir. Adont s’armerent toutes manieres de gens et se tindrent par bon arroy et par bonne ordonnance devers le chastel et les bastides, qui estoient faittes, ouvrees et charpentees par grant maniere, et fust pour la dedens demourer vingt ans, et y avoit, a l’entour des bastides, fossés, portes, tours et bons murs et tout de gros bois moult bien fortiffié. ¶ Or vindrent chevalliers et escuiers d’Angleterre qui vouloient et desiroient a faire fait d’armes, jusques aux barrieres de la bastide. Si encommencierent a escarmuchier de grant fachon et de grant desir et voulenté pour conquerir les bastides; et ceulx qui dedens estoient, chevalliers et escuiers bretons et