li penseur, ne fussent li contrepenseur. Je le dy pour tant que s’il y avoit en l’ost des Anglois des compaignons duits et soubtils de la guerre, les Bretons et les Normans qui se tenoient en icelles bastilles, estoient aussi pourveüs assés de veoir et congnoistre quelle chose leur pouoit valloir et porter domaige. Certes ils congnurent clerement que il les convenoit partir de la et traire en quelque part que ce fust, a garant, se ils ne vouloient estre mors ou prins. Si orent conseil de partir et de trousser ce qu’ils pourroient, et laissier leurs bastides. Si comme ils ordonnerent pour le mieuls, ils le firent; car ils trousserent tout et monterent sur leurs chevauls, si laissierent la bastide, et se misrent aux champs et prindrent le chemin de Hainbont ou il n’y a que quatre lieues de la. Ils ouvrerent sagement de ce faire et de monter a cheval et de partir; car ils n’avoient garde que les Anglois les poursievissent pour tant que ils n’avoient encoires trait leurs chevauls hors de leurs nefs. Messire Jehan de Malattrait et les chevalliers et escuiers qui avecques luy estoient, vindrent celle nuyt a Hainbont et la trouverent toute ouverte et appareilliee: la n’orent ils garde des Anglois. Quant ce vint au matin, l’on