pennon saint George, et se mist au chemin en moult grant desir de trouver les François. Si chevauchierent tant que ils vindrent au lieu dit l’Espinette et sur le pas, ou ils trouverent leurs gens mors, dont ils furent tous courrouchiés, et les François estoient ja rettrais et rentrés ou chemin lequel ils estoient venus, ne jamais, qui ne les eust menés, ils n’eussent sceu revenir a leur chemin. Si s’en retournerent les Anglois sans riens faire, et tout ainsi comme ils estoient a une demie lieue de leur ost, ils regarderent et veirent sur costé la route des François qui retournoient au chastel de la Couloigne. Si furent moult courrouchiés, mais amender ne le porent, et fut ce jour en l’ost moult blasmés d’aucuns en requoy le mareschal pour tant que il envoioit et avoit envoié fourragier, ne consenty a aler leurs gens si simplement que sans gens d’armes, quant il sentoit leurs ennemis logiés si pres de leur ost, et fors assés pour ruer jus cinq ou six cens fourageurs. Et vous dy que proprement le duc et le connestable l’en blasmerent tant que il en fut tout honteux; mais il s’escusa et dist que sans celle fois il y avoient esté dix fois, et point n’y avoient les fourageurs receu