n’aloient que le pas, et misrent trois jours a venir de la Couloigne jusque a la ville de Saint Jaques. ¶ Vous devés savoir que le paiis de Gallice pour la venue du duc de Lancastre estoit moult effrayé; car ils ressoingnoient grandement sa puissance. Le mareschal de l’ost, qui estoit en l’avantgarde, s’en vint jusques a la ville que l’on appelle Compostelle ou paiis, ou le corps monseigneur saint Jacques l’Apostre, que l’on requiert de si loing, gist et est. ¶ Quant il fut venu jusques a la ville, il la trouva fermee, ce fut raison, mais il n’y avoit quelque garnison fors les hommes de la ville; car nul chevalier de France ne la vouloit prendre en son peril pour la tenir, ne garder honnourablement jusques a oultrance, car elle n’est pas trop forte, a bien parler, contre tels gens que le duc de Lancastre avoit mis hors du roiaulme d’Angleterre ou paiis de Castille et de Gallice. Le mareschal envoia devant ung herault pour savoir que ceulx de Saint Jaques diroient. Le herault vint aux barrieres et trouva le capitaine de la ville, qui s’appelloit Alphons de Serie. Il luy dist: "Capitaine, or entendés cy ung petit. Assés pres de cy est le mareschal de l’ost monseigneur de Lancastre, qui m’envoie