navires et le regard, quoyqu’on eust grant nombre de gallees, de nefs et d’autres vaisseauls, si ne pourroient ils nullement passer tous du premier passage a XL mille hommes pres. Adont fut par conseil advisé et ordonné comment l’on feroit: ce fut que nuls ne seroit receu pour passer s’il n’estoit droit homme d’armes. Et ne pouoit avoir ung chevallier que ung varlet, et ung grant baron deux escuiers. Et ne passeroit on nuls chevauls fors pour le corps des seigneurs. Et a tout ce faire et ordonner avoit on mis a l’Ecluse grant regard et fort tel que nuls n’estoit recueillié, ne escript, se il n’estoit droit homme d’armes, mais il y avoit tant de ribaudaille sur le paiis tant en Flandres et Tournesis, en la chastellerie de Lille et de Douay comme en Artois, que ils mengoient et riffloient tout, et la se tenoient aux frais et coustages des povres hommes, et estoient par iceulx pillars et garchons mengiés leurs biens, ne ils n’en ousoient parler, ne dire mot, et faisoient ces gens pis que les Anglois n’eussent fait, se ils eussent esté logiés ou paiis. Et si estoit tres grant doubte que, le roy et les princes passés oultre en Angleterre et tels gens demourés derriere, que ils ne se meissent ensemble pour tout