Moult desiroit la duchesse de Lancastre la revenue du duc, son mary et seigneur, pour savoir de toutes nouvelles et comment les accointances s’estoient portees. Si fut le duc moult bienvenu a son retour, ce fut raison. La dame lui demanda du roy de Portingal quelle chose il luy en sembloit: "Par ma foy," dist le duc, "il est gracieux prince et a bien corps, maniere et ordonnance de vaillant homme; et est mon espoir tel que il regnera en puissiance, car il est amé de ses gens, et dient que ils n’eurent, passé a cent ans, roy qui si bien leur cheïst en cuer, ne en grace. Et n’a encoires d’eage que XXV ans. Il est fort chevallier et dur selon la nature des Portingalois, et est bien taillié de corps et de membres pour porter et souffrir peine." "Et des mariages," dist la dame, "comment en va?" Respondi le duc: "Je luy ay accordé l’une de mes filles." "Laquelle?" dist la dame. "Je l’en mis a chois," dist le duc, "ou de Phelippe ou de Katherine. Il m’en sceut bon gré. Toutesfois il s’est arresté sur Phelippe." "Il a raison," dist la dame, "car ma fille Katherine est encoires trop jeune pour luy." ¶ Ainsi le duc et la duchesse passerent le jour et aussi le temps. Faire le convenoit, car l’iver leur approchoit. Or en ce paiis de Galice, ne en Portingal on ne scet que c’est