The Online Froissart

Facsimile mode Settings Browse | Collate

pb 152 v

passees, le peuple se troubla pour savoir que si grant argent estoit devenu, ne ou il estoit alé, ne contourné, et en vouldrent aucunes bonnes cités et villes d’Angleterre avoir compte, avecques ce que les oncles du roy y rendirent grant payne, si comme je vous recorderay enssieuvant quant il sera temps et heure d’en parler, car je ne vueil de riens estre oublieus, qui appartiengne a ceste histoire. Messire Simon Burlé estoit capitaine du chastel de Douvres. Si oyoit bien souvent nouvelles de France par ceulx de Calais et par les pescheurs des bandes d’Angleterre qui s’aventuroient en mer ainsi que ils font par usaige, car pour avoir ung poisson, ils vont souvent peschier dessoubs Boulongne et devant le port de Wissant. Si rapportoient souvent des nouvelles a messire Simon Burlé, qui leur en demandoit; car autres pescheurs de France, quant ils s’entrecontroient, leur en disoient assés et souvent plus que ils n’en savoient; car sur mer pescheurs, quelque guerre qu’il soit dentre France et Angleterre, ne se feroient jamais mal, ainchois sont amis et aident l’un a l’autre au besoing, et vendent et achatent sur mer l’un a l’autre leur poisson, quant les ungs en

ont plus largement que les autres; car, se ils se guerroioient, on ne auroit souvent point de maree, ne nul ne oseroit aler peschier, se il n’estoit conduit et gardé de gens d’armes. ¶ Messire Simon Burlé entendoit par les pescheurs de Douvres que point n’y auroit defaulte que le roy de France ne passast en Angleterre, et vendroient les François prendre terre a Douvres l’une des parties, et l’autre au port

de Zandvich, et devoient passer gens sans nombre. Messire Simon creoit bien toutes ces paroles et les tenoit pour veritables, et aussi faisoit on partout en Angleterre. Si vint ung jour a Cantorbie et ala en l’abbaye qui est moult grande et moult: belle, et d’autre part siet l’abbaye Saint Vincent, laquelle est aussi moult belle et moult puissante et riche sans mesure. On luy demanda des nouvelles, et il en dist ce qu’il en savoit, et par ses paroles il monstroit bien que la chasse de saint Thomas, qui tant est riche et digne, n’estoit pas seurement a Cantorbie, car la ville n’est point forte. "Et se les François viennent," dist messire Simon, "ainsi que ils feront tantost, pour la convoitise de gaignier, pillars et larrons affuiront en ceste ville, et vous roberont et vostre eglise. Et pb 153 r

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters Printed Editions
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.