The Online Froissart

Facsimile mode Settings Browse | Collate

pb 15 v

avoit moult grant pitié. "Assés," dist le duc, "faittes ent vostre voulenté. Il me plaist tres bien." A ces mots messire Garsis du Chastel, si comme il me dist, pour delivrer iceulx hostagiers s’en aloit; si rencontra sur son chemin messire Olivier de Clichon qui luy demanda ou il aloit et dont il venoit. Il luy dist: "Je viens de devers monseigneur d’Angou et voy delivrer ces hostagiers que vous sçavés." "Delivrer!" dist messire Olivier, "attendés ung petit et retournés avecques moy devers le duc." Il retourna, et s’en vindrent devers le duc qui estoit tout pensif a son logeis. Messire Olivier le salua, puis luy dist: "Monseigneur, quelle est la vostre intention? Ne morront point ces hostagiers? Par ma foy, si feront en despit de messire Robert Canolle et de messire Hues Broec qui ont leur foy mentie; et vueil bien que vous sachiés, se ils ne meurent incontinent, dedens ung an je ne mettray bacinet pour vostre guerre. Ils auroient trop bon marchié, se ils estoient ainsi quittes. Ce siege vous a cousté plus de soixante mille frans, et puis vous voulés faire grace a vos ennemis qui ne vous tiennent ne foy, ne loiaulté." ¶ A ces mots se aÿra et

esmut le duc d’Angou plus que devant, et dist: "Messire Olivier,

faittes ent ce que bon vous semble." "Je vueil qu’ils meurent," dist messire Olivier, "il y a cause puis que l’on ne nous tient nos convenences." Lors se party messire Olivier de la presence du duc, et vint en la place devant le chastel, ne oncques messire Garsis n’osa parler ung seul mot, ne prier de paix pour euls, car il eust perdu sa paine puis que messire Olivier de Clichon l’avoit entreprins. Il fist appareillier Jaucelin ( celluy estoit le trence teste), et fist la decoler deux chevaliers et deux escuiers, tantost qu’ils furent confessés et adrechiés, dont l’on eust grant pitié, et parmy l’ost en plourerent maint noble et autres de toutes sortes. Quant messire Robert Canolle vit que l’on avoit ainsi fait morir ses chevaliers et ses escuiers, il fist ouvrir une posterne hors du chastel, et sur le bort des fossés il fist au despit des François decoler tous les prisonniers qu’il tenoit en Derval, ne oncques il n’en respita homme; et puis fist ouvrir la porte du chastel et avaler le pont et saillir tous les compaignons qui la dedens estoient, et aler aux barrieres et venir combatre et escarmuchier a ceulx du siege. Et vous dy, si comme messire Garsis me racompta, que il y eust escarmuche tresdure et tresforte. pb 16 r

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters Printed Editions
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.