et fut en Barselonne la cité. Quant les nouvelles vindrent a Bourdeaulx de l’empeschement de l’archevesque au seneschal, si dist: "Je n’en pensoie ja moins; car nostre archevesque a trop chaude teste. Encoires croy je qu’il vaulsist autant que je y fuisse alé, car j’eusse parlé plus a point. Il y a bien maniere par tout le monde a demander le sien." Le seneschal rescripsy toutes ces nouvelles au duc de Lancastre, qui se tenoit en Gallice. Le duc en fut grandement courrouchié et se contenta mal du roy d’Arragon et de son conseil, quant on avoit l’archevesque de Bourdeaulx, ung si grant prelat, retenu et mis en prison, en exploitant ses besoignes. Adont rescripvy le duc aux compaignons de Lourde que a, toute rigueur ils voulsissent guerroier ceulx de Barselonne ou l’archevesque de Bourdeaulx estoit en prison, et par especial a Jehan de Berne, qui en estoit capitaine et qui se nommoit seneschal de Bigorre, de quoy Pierre d’Anchin, Ernaulton de Restem et Ernaulton de Sainte Coulombe et tous les compaignons de la garnison de Lourde furent grandement resjouïs, et bien dirent que c’estoient bonnes nouvelles. Si commencierent a courir ens ou roiaulme d’Arragon et jusques aux portes de Barselonne Et tant quepb 163 r