faittes courses et envahies par les compaignons, bons adventuriers, qui se desiroient a avanchier, et estoient le duc et ses gens logiés en celle tant belle praierie entre la ville de Tournay et Mauvoisin et tout sur la belle riviere de Lisse. ¶ Le siege estant devant le chastel de Mauvoisin, messire Garsis du Chastel, qui estoit mareschal de l’ost, s’en vint atout cinq cens combatans et deux cens archiers et arbalestriers, et bien deux mille autres hommes de communes, mettre le siege devant le chastel de Trigalet, que nous avons icy laissié dernierement derriere nous, lequel chastel ung escuier gascoing avoit en garde pour le seigneur de la Barde, car il estoit son cousin, et s’appelloit le Bascot de Maulion, et y avoit environ quarante compaignons dedens, qui estoient tous maistres et seigneurs de Lane de Bourg, ne nuls ne pouoit passer, ne chevauchier parmy ce paiis, se il n’estoit pellerin alant a Saint Jacques, com fort qu’il fuist de gens, qu’il ne fuist prins mort ou ranchonné, avecques une autre forte place vers Lamesen, de laquelle tous pillars et robeurs assamblés de tous paiis avoient fait une garnison, laquelle place est nommé le Nentilleux, et est une forte place qui tousjours a esté en debat d’entre le conte de Fois et le pb 16 v