Ainsi se devisoient en la presence du roy a la fois les chevalliers de France qui desiroient les armes. Et fut la dit au roy: "Ce seroit bon que vous envoyés jusques a cent lances en la ville et ou chastel de Noye; car, se ils l’avoient et le chastel de la Couloigne, ils auroient les deux principauls au lés devers Gallice." "Et quy y pourrons nous envoier?" dist le roy. La se presenterent plusieurs chevalliers, messire Tristran de Roye, messire Regnault, son frere, messire Robert de Bracquemont, messire Tristan de la Gaille, messire Jehan de Chastel Morant et messire le Barrois des Barres; et le roy les oyoit parler et eulx presenter, et leur en sçavoit bon gré: "Beaus seigneurs," dist le roy, "grant merchis de vostre bonne voulenté. Vous n’y poués pas tous aler. Il fault bien que il en demeure aveuc moy pour toutes aventures qui pevent advenir. Messire le Barrois des Barres qui cy est present, je luy prye que il en prende la charge comme il se y presente et que bien luy plaist." Le Barrois fut tout resjoÿ de ce present et denommement, car a son hait trop avoit sejourné. Si dist: "Sire roy, grant merchis, et sachiés que je garderay le fort a mon pooir, et le vous renderay sain et saulf ou a vostre commis. Et, moy dedens venu, je ne m’en departiray, si me manderés." pb 175 v