aler conquerir villes et chasteaulz
en Gallice. Encoires n’estoit pas
le duc seigneur de tous les chasteaulz
ne de toutes les villes, si fut par
le conseil du duc ordonné, et il
appartenoit que il fust ainsi que
quant le duc partiroit de la ville
de Saint Jaques, la duchesse et
sa fille Katherine en partiroient
aussi et s’en yroient au Port de
Portingal veoir le roy et la jenne
royne. Si furent ainsi ordonnees
les besoingnes comme dit est du
duc, et de leur jenne fille aussi.
Et fut la ville de Saint Jaques a
ung chevallier d’Angleterre bailliee
a garder, et pour en estre le chief
et capitaine. Lequel on appelloit
messire Loÿs Cliffort. Et avoit par
dessoubz luy trente lances et cent
archiers. SHF 3-141 sync ¶ Or se departy le duc de Lancastre et toute sa compaignie; car nuls ne demoura en la garnison, fors ceulx qui par les capitaines estoient ordonnés a demourer. Si chevauchierent le duc et la duchesse devers la cité de Besances, c’est a l’un des cornets de Gallice la derniere bonne ville devers le roiaulme de Portingal et ou droit chemin du Port et de Connimbres. Et pour ce que madame de Lancastre et sa fille devoient aler devers le roy et la royne, tindrent elles le chemin du Port.