c’est bon que ils soient receus parmy le traittié que ils mettent en avant, car je croy bien que le roy de Castille n’a nulle voulenté de combatre si prestement." "Je ne sçay", dist le duc. "Dieu doinst que tantost il viengne a la bataille. Si serons de tant plus tost delivrés, car je vouldroie que ce fust dedens six jours. Et puisque vous le voulés, je le vueil aussi." Adont se retourna la dame devers les bons hommes. Si leur dist: "Alés. Vous avés exploittié, mais delivrés douze de vos hommes des plus notables de la ville au mareschal, qui soient plesges pour tenir ce traittié." "Bien, madame," respondirent ceulx. Alors se leverent ils, et messire Jehan Soustree fut esleu et chargié, qui amenés les avoit, de faire ceste response au mareschal, lequel moult bien se contenta, quant ils furent retournés devers luy. Et ceulx s’en retournerent a Besances. Si racompterent a la communaulté comment ils avoient exploittié. Adont furent prins en la ville douze hommes des plus notables de la ville et envoiés pardevers le mareschal. Ainsi demoura la ville de Besances en paix parmi la condition que je vous baille; et tantost ils envoierent devers le roy de Castille, quant ils orent parlé ensemble et ils furent conseilliés pour savoir comment ilz