SHF 3-143 sync Ainsi se tindrent ensemble en ces paroles et autres le roy de Portingal et la duchesse. Or retournerons ung petit a ceulx de Besances et racompterons comment ils exploittierent. Quant ces six hommes de Besances furent venus devant le roy de Castille, ils se misrent a genoulx et dirent: "Tres redoubté seigneur, il vous plaise a entendre a nous. Nous sommes cy envoiés depar nostre ville de Besances, laquelle s’est mise et de force en composition devers le duc de Lancastre et la duchesse, et ont souffrance de non nous assaillir noeuf jours entiers, et la en dedans, se vous y venés fort assés ou envoiés tellement que pour combatre et resister contre la puissance du duc, la ville vous demoura, et se non, ils se sont obligiés et en ont bailliés hostaiges qu’ils se rendront. Et ainsi, tres redoubté roy, il vous plaise a respondre quelle chose vous en ferés." Le roy respondi et dist: "Nous nous conseillerons, et puis vous aurés response." Adont se party le roy de leur presence et rentra en sa chambre. Je ne sçay se il se conseilla ou non, ne comment la besoigne se porta; mais ces six hommes de Besances furent la huit jours que oncques ne furent respondus, ne depuis ils ne veirent point le roy. Or vint le jour, que la ville se pb 182 v