le duc de Lancastre sejournoit en la ville de Besances, que nouvelles arriverent du Val d’Olif, et les apporta ung herault de France, lequel demanda, quant il fut venu a Besances, l’hostel de messire Jehan de Hollandes. On luy enseigna. ¶ Quant il fut venu la, il s’agenoulla devant luy, et luy bailla unes lettres, et luy dist en les luy baillant: "Sire, je suis ung herault d’armes que messire Regnault de Roye vous envoie et vous salue. Si vous plaise a lire ces lettres." Messire Jehan de Hollande respondi et dist: "Voulentiers, et tu soies le bienvenu." Adont ouvry il les lettres et les leut, et contenoient que messire Regnault luy prioit qu’en nom d’amours et de sa dame, il luy voulsist delivrer de trois coups de lances acherees a cheval et de trois coups d’espees, de trois coups de dagues et de trois coups de haches. Et, se il luy plaisoit a aler au Val d’Olif, il luy avoit pourveü ung saulfconduit de soixante chevauls; et se il avoit plus chier a Besances, il luy prioit que, alant et retournant luy XXXe de compaignons, il luy empetrast ung saulfconduit au duc de Lancastre. ¶ Quant monseigneur Jehan de Hollandes eut leues les lettres, il commença a rire et regarda sur le herault en luy disant: "Compains, tu soies le bienvenu. Tu m’as pb 187 v