le roy et le duc ensemble en la ville, et tous furent leurs hostels assés bien ordonnés, ainsi comme il appartenoit et a l’aisement du paiis; mais ce ne fut pas si largement comme a Paris. ¶ Environ trois jours aprés que le roy de Portingal fut venu a Besances, vint messire Regnault de Roye bien accompaignié de chevalliers et d’escuiers de leur costé, et estoient plus de VIXX chevauls. Si furent tous bien logiés a leur aise; car le duc en avoit fait ordonner par ses fourriers. ¶ A l’endemain qu’ils furent venus, messire Jehan de Hollande et messire Regnault de Roye s’armerent et monterent a cheval, et s’en vindrent en une belle place sabelonneuse pardedens le clos de Besances, ou les armes se devoient faire. Et estoient la aucuns eschaffauls ordonnés pour les dames ou toutes monterent, et le roy et le duc et les autres seigneurs d’Angleterre et de Portingal, dont il en avoit a plenté; car par especial d’Angleterre tous y estoient venus pour veoir faire les armes des deux chevalliers, lesquels vindrent assés tost si bien estoffés de chevauls et de harnois que mieuls on ne pouoit. Et leur portoit on leurs lances, leurs haches et leurs espees; et estoit chascun monté sur fleur de coursiers. Puis vindrent l’un devant l’autre arrester loing ainsi que le trait d’un archier,