car, se vous vous y boutés, et aprés je vous puis tenir, je vous livreray a Jaucelin qui vous fera vos barbes sans rasoir." "Monseigneur," respondit Raymonnet, "s’il est ainsi que nous nous partions de Mauvoisin et retraions ou que soit, il nous fault emporter ce qui est nostre, car nous l’avons gaingnié par armes et en grant aventure moult souvent de nos vies." Le duc pensa ung petit, puis respondi et dist: "Je vueil bien que vous emportés devant vous en malles et en sommiers, et non autrement, ce qui est vostre; et, se vous tenés nuls prisonniers, ils nous seront tous rendus." "Je le vueil ", dist Raymonnet. Ainsi se porta leur traittié que recorder me oyés, car toute la garnison en fut contente. Si trousserent leurs biens et se departirent tous ceulx qui dedens estoient, et rendirent le chastel au duc d’Angou et enmenerent et porterent devant eulx ce que chargier peurent, et s’en ala chascun en son lieu ou autre part querir son mieulx; mais Raymonnet de l’Espee se tourna françois, et depuis il servy le duc d’Angou en armes moult loiaulment et grant temps, et passa oultre en Ytalie avecques luy, et fut occis a une escarmuche devant la noble cité de Napples, lorsque le duc d’Angou et le conte de Savoie y firent leur voiage."