traioit sur les champs si fort que pour demander la bataille, ils se trairoient ensemble, car il fut advisé et regardé que leurs deux osts conjoints et mis en ung, ne se pourroient pourveoir de vivres pour euls et leurs chevauls, ne eulx eslargir, et a celle cause, espoir, par maladies en pourroit morir grant nombre de leurs gens, tant aussi pour leurs logeis comme pour les fourages; car Anglois sont moult orgueilleux et hastifs sur les champs, et Espaignols chauls et boullans et tantost par paroles entreprins; ne ils ne sont, se petit non, souffrans; mais pour attendre une grosse besoingne et une grant bataille ils seroient bien ensemble; la se concorderoient ils tres bien, et ainsi feroient Gascoings. ¶ Ce conseil fut arresté et dist le roy de Portingal au duc de Lancastre: "Sire, quant je sçauray que vous chevaucherés, aussi tost chevaucheray je; car mes gens sont tout prest, ne ils ne demandent autre chose que bataille." Adont respondi le duc de Lancastre: "Sire, sachiés que je ne sejourneray pas longuement. L’en m’a dit qu’il y a encoires en Gallice aucunes villes rebelles qui point ne veulent venir en l’obeissance de nous. Je les iray visitter et conquerre, et puis chevaucheray celle part ou je cuideray plus tost trouver pb 190 v