conseillent la bataille." "Et pourquoy dont, n’en ont parlé ceulx qui sont tenus d’en parler, messire Guillemme de Lignach et messire Gaultier de Passach?" "Pour tant", respondirent les autres, "que ils veulent savoir l’oppinion de tous; car il ne puet estre que bien ne leur ait esté dit au partir de France par le conseil du roy et du duc de Bourbon quelle chose ils ont a faire, eulx venus par deça, et par raison nous le devrions savoir demain." Si furent en plusieurs estrifs aucuns chevalliers de France ce jour et ce soir, et autretant bien d’autre part estoient les Espaignols; et ne conseilloient pas ceulx qui amoient le roy a combatre pour plusieurs raisons; car, se il se combatoit et la journee estoit contre luy, sans l’ecouvrier il perdoit son roiaulme, et le roy aussi tenoit bien ce propos et ressoingnoit les fortunes et ne sçavoit pas, ne savoir ne pouoit tous les courages de ses hommes, ne lesquels l’amoient, ne lesquels non. Si demoura toute la besoingne ainsi jusques en l’endemain que tous retournerent ou palais du roy; puis entrerent en parlement. En ce parlement eut maint propos et mainte parole arguee, ditte et retournee; car chascun a son pouoir vouloit le roy Jehan loyaulment conseillier. Et bien pb 194 v