The Online Froissart

Facsimile mode Settings Browse | Collate

pb 258 v

au duc de Lancastre, et bien y avoit cause, car il veoit ses haultes emprinses et ymaginations reboutees en dur party, et touteffois, comme saige et vaillant prince que il estoit, il se confortoit assés gracieusement, car bien veoit qu’il n’en pouoit pour le present avoir autre chose. ¶ Quant le roy de Portingal vit que les choses se portoient ainsi et que son armee et par especial celle du duc estoient rompues, il donna congié a toutes manieres de gens qui le estoient venus servir et en retint environ trois cens lances, et se departy de Aurenc aveuc le duc de Lancastre, et sa femme aussi, et chevauchierent jusques en la ville de Saint Jaques que l’on dist en Compostelle. ¶ Quant le roy et le duc furent la venus, le roy y sejourna quatre jours. Au Ve il se departy o toute sa gent qui accompaignié l’avoient, et retourna vers son paiis et sa femme qui estoit au Port, une bonne cité en Portingal. Or devés vous savoir, et je le vous diray, quelle chose il advint a plenté de bons chevalliers et escuiers qui estoient departis de la route du duc et retrais en Castille et espartis en plusieurs bonnes villes et cités sur le paiis. Ceulx qui estoient entechiés de la maladie, combien que ils cheminassent et querussent nouvel

air et nouvelles medechines, ne peussent fuir que ils ne morussent en sejournant en Ville Arpent. Entandis que le roy Jehan de Castille avoit envoié querre en Navarre et en France les saulfconduits pour passer paisiblement les Anglois parmy leurs terres et seignouries, ainsi comme il leur avoit prommis, ce qui

ne fut pas si tost fait, entandis que ceulx qui envoiés y estoient, y alerent, se morurent plusieurs barons, chevalliers et escuiers d’Angleterre sur leurs lits, dont ce fut dommaige et affoiblissement pour leur paiis. En Ville Arpent morurent trois hauls barons d’Angleterre et riches seigneurs, lesquels estoient nommés: tout premierement celluy qui avoit esté souverain mareschal de l’ost du duc, messire Richart Burlé, le seigneur de Ponninges, et messire Henry de Persy, cousin germain au conte de Northombrelande. En la ville de Noye morut messire Mauburny de Linieres, Poitevin, ung moult vaillant et appert chevallier. En la ville de Ruellés morut ung grant baron de Galles qui s’appelloit le sire de Tallebot, et morurent, que ça, que la, de celle pestillence douze barons d’Angleterre et bien IIIIXX chevalliers et plus de IIC escuiers, tous gentilshommes. Or regardéz la grant desconfiturepb 259 r

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters Printed Editions
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.