Et la estoient entour luy les aucuns de France qui desiroient fort a veoir le duc de Bourbon. Si passa le duc Valence et Sarragoce et tous les pors, et entra en Espaigne et vint a Burgues. Si fut du roy et des prelas et seigneurs du paiis moult grandement recueillié, et estoient la messire Olivier du Glayaquin, connestable de Castille, messire Gaultier de Passach et messire Guillemme de Lignach, messire Jehan de Barres, messire Jehan et messire Regnault de Roye et plusieurs chevalliers de France, qui tous avoient laissié leurs garnisons pour venir veoir le duc de Bourbon, car des Anglois, ne des Portingallois ils n’avoient que faire de soy doubter. Tout estoit rettrait, comme dit est, et laissoient desja en Gallice plusieurs les villes, cités et forteresses que ils avoient conquises; car bien savoient que contre la puissance de France ils ne les pourroient tenir ou cas que leurs gens estoient tous departis et yssus hors de Gallice et retrais l’un ça, l’autre la, si comme vous avés ouy recorder ung petit avant en ceste presente histoire. Nouvelles vindrent en Galice que le duc de Bourbon estoit venu en Espaigne et avoit amené grant nombre de chevalliers de France, et faisoit on en parlant la chose pb 262 v