saisine des trois chasteauls et que elle les tendroit pour elle et son hoyr comme son bon heritage, mais, voulsist le duc de Guerles nourrir amours et bon voisinage a Brabant, il remeist arriere hors de ses mains la ville de Grave que indeuement il tenoit sur la duchesse de Brabant. Quant le duc de Guerles oÿ ces responses, si ne luy furent pas moult agreables, mais les prist en despit, et n’en pensa pour tant pas moins, et jetta sa visee sur le chevallier qui souverain regard estoit des trois chateauls, messire Jehan de Grosset, pour lui attraire et pour les recouvrer par rachat ou autrement, et fist tres couvertement traitier pardevers luy; mais le chevallier qui estoit sage et loial, n’y volt entendre et dist que de tels choses on ne luy parlast plus, car, pour mort a recepvoir, l’on ne trouveroit ja deffaulte en luy, ne qu’il voulsist faire nulle trahison envers sa naturelle dame. ¶ Quant le duc de Guerles vit ce, si comme je fus lors infourmé, il fist tant devers messire Regnault d’Esconnevort que il emprist une hayne a petit de ochoison pardevers le chevallier, et tant que une fois sur les champs il l’encontra ou