je plus demeurer avecques luy. Si ay prins ma fille que veés cy; je la vous encharge et delivre, et vous fay tuteur et curateur pour la nourrir et garder, car bien sçay que pour amour de lignaige a ce besoing vous ne me fauldrés pas, car je n’ay aujourd’huy fiance certaine pour Jehane, ma fille, bien garder fors en vous. Je l’ay a moult grant paine extraitte et transportee hors du paiis et des mains du pere; mais pour tant que je sens ceulx d’Armeignach, mes adversaires et les vostres, engrans de embler ma seule fille pour ce qu’elle est heretiere de Comminges, je l’ay amenee devers vous. Si ne me fauldrés pas a ce besoing, et je vous en requier, et bien croy que son pere, mon mary, quant il saura que je la vous ay ainsi laissee, en sera tout resjouÿ, car ja pieça m’avoit il dit que ceste fille le mettoit en grant pensee et en grant doubte." Quant le conte de Fois ot ouÿ ainsi parler madame Alienor, sa cousine, si fut moult resjouÿ, et ymagina tantost en soy meismes (car il est ung seigneur moult ymaginatif ), que encoires celle fille luy vendroit grandement a point. Ou il en pourroit avoir ferme paix envers ses ennemis, ou il la pourroit marier en tel lieu et si haultement pb 28 v