Quant messire Gaston ouy ces paroles de excusations, et il percheut qu’il ne seroit point aidié, ne conforté du conte d’Armeignach, il en fut moult esbahy, et demanda conseil au conte de Fois et aux barons de Berne comment il se maintendroit: "Monseigneur," dist le conte de Fois, "puisque nous sommes icy assamblés, nous irons combatre vos ennemis." Ce conseil fut tenu; ils s’armerent, et ordonnerent leurs gens, lesquels estoient environ douze cens heaulmes et six mille hommes de piet. ¶ Le conte de Foix mena la premiere bataille, et s’en vint courir sur le roy d’Espaigne et ses hommes en leurs logis, et la ot tres grant bataille et moult felonesse pour l’une partie et pour l’autre, et y eut occis sur les champs plus de dix mille Espaignols. Et la prinst le conte de Fois le fils et le frere du roy d’Espaigne, et les envoia devers son seigneur, messire Gaston de Berne, qui estoit en l’arrieregarde, et la furent le roy d’Espaigne et les Espaignols si tres desconfis que le conte de Fois les chassa jusques au port Saint Andrieu en Bisquaie. Et se bouta le roy d’Espaigne en l’abbaye, et vesty l’abit d’un moisne: autrement il eust esté prins et saisy. Si se sauverent par leurs vaisseaulx ceulx qui sauver se peurent, et se bouterent en mer. pb 30 r