Online Froissart
Home  |  Navigate  |  Apparatus  |  Search  |  About the Edition  |  About the Project  |  Help
Facsimile mode    Settings    Browse  |  Collate      
Navigate | Close
Preferences
Berlin Rehdiger 3
Previous | Folio 321 v | Next
pb 321 v

plairoit sans faire point grant mention du roy, mais mettroit en termes que il vouloit faire une chevauchiee pour luy et pour son fait meismes en Austriche. ¶ Le sire de Coucy sur cest estat party de Paris, et s’en vint a Chaalon en Champaigne et la se tint environ ung mois, et retint de toutes pars chevalliers et escuiers en Barrois et en Loheraine, en Champaigne et en Rethellois. Le roy de France se departy de Paris, quant on ot parlementé et traittié aucunement au duc de Bretaigne, mais non pas encoires tout accomply; car la court du roy de France est moult longue quant on veult, et tres bien l’on y scet tenir les gens et faire le leur despendre et petitement besoingner. ¶ Le roy s’en vint a Moustreau Fault Yonne en la marche de Brye et de Gastinois, et la tint son hostel, et souvent chassoit aux cherfs et aux autres bestes es forests de Brye et de Gastinois, et y prendoit ses deduits. Le roy la estant, il y ot une emprinse d’armes qui s’entreprist d’un chevallier d’Angleterre qui estoit aveuc le duc d’Irlande, lequel on appelloit messire Thomas Harpinghem, et de messire Jehan des Barres, de laquelle hatie il fut parmy le roiaulme de France grans nouvelles et ailleurs aussi, et se

devoit faire l’emprinse et fait d’armes de cinq lances a cheval, de cinq coups d’espee, de cinq coups de dague et de cinq coups de hache, et, se leurs bastons dont ils devoient frapper rompoient, ils en pouvoient recouvrer des nouveauls tant que leurs armes seroient parfaittes. Et ung jour monterent les chevalliers sur leurs chevauls, quant ils se furent bien armés comme a telle besoingne appartient, et pourveüs de tous leurs habillemens pour faire leurs armes, et la estoient le roy et les seigneurs et grant nombre de barons et de chevalliers et de pueple pour veoir les armes. Si jousterent sur leurs chevauls quatre lances moult roidement, et furent assés bien assises, et est l’usaige, ce me semble, a tout le moins l’estoit il adoncques, que l’en ne attachoit son bachinet que a une seule laniere, a celle fin que le fer du glaive ne s’i attachast. Le cinquiesme coup du glaive fut tel que messire Jehan des Barres consieuvy tout a plain coup en la targe du chevallier anglois dont il estoit couvert, et l’empaigny de telle fachon et maniere que il le porta jus oultre la crupe de son cheval et l’abaty tout estourdi, et convint a grant paine messire Thomas relever. Depuis fut il pb 322 r