a petit de deffense, et les Allemans les prendoient et creantoient trop voulentiers pour le grant prouffit que ils en attendoient a avoir. Ceulx qui retournoient aux logeis devant Grave, esbahissoient ceulx qui estoient demourés, car ils venoient, ainsi que gens tous desconfis, en leur grosse alayne, ne a paynes avoient ils puissance de parler, ne de dire: "Recueilliés tout, car nous sommes tous desconfis, ne en nous n’a nul recouvrier." Quant ceulx des logeis eurent entendu la verité de la besoigne, et ils veirent leurs gens en tel party d’armes, ils furent tous espoventés, et n’eurent point les plusieurs le loisir et puissance de prendre leurs biens, ne au deslogier leurs tentes et pavillons, ne du trousser, ne mettre a voitture, mais se departoient le plus sans dire: "A Dieu!" et laissoient tout derriere, car ils estoient tant effraés que nulle contenance d’arroy, ne de ordonnance ils n’avoient, ne recouvrier ne monstroient, ne n’avoient entre euls vitaillier ne voitturier qui ne laissassent leurs chars et leurs sommiers et pourveances, car ils montoient sur leurs chevauls et se mettoient a saulfveté. Si s’enfuioient vers le Boys le Duc ou vers Heusden ou le Mont Sainte