fait on jurer solempnellement au jour de leur couronnement et creation pour entretenir fermement les deux roiaulmes en paix et unité. Si fut advisé et conseillié ou cas que le roy de France vouldroit aler en ce voiage, c’est a entendre en Guerles, et Guerles est tenue du roy d’Allemaigne, que on envoieroit sommer le roy d’Allemaigne souffissamment en luy remonstrant depar le roy de France et son conseil que le duc de Guerles impetueusement et fellement avoit deffié le roy de France de deffiances dures et felles et hors du stille et usaige que tous seigneurs qui se veulent guerroier, deffient l’un l’autre; et pour ce duc de Guerles faire desdire et mener a raison, le roy de France a main armee et a puissance vouloit venir en Allemaigne non a l’encontre du roy d’Allemaigne et de sa seignourie, mais contre son ennemy, et le requerre la ou il le pourroit trouver. Pour faire ce voiage si en furent chargiés messire Guy de Honcourt, ung moult sage et pourveü chevallier, et avecques luy l’un des maistres de parlement, qui s’appelloit maistre Yves de Eurient. Ces deux dessus dits furent nommés ou conseil du roy et chargiés d’aler ou voiage pardevers le roy d’Allemaigne