se tenoient, et ces seigneurs furent justement infourmés de la verité comment la besoingne de Ottebourg s’estoit portee et le grant conquest que leurs gens avoient eu et fait, si en furent grandement resjoÿs et courrouchiés aussi pour tant que ils n’y avoient point esté. Si eurent conseil de deslogier et euls retraire en leur paiis puisque leurs gens s’estoient retrais. Lors ils se deslogierent de devant Carlion et se misrent au retour en rentrant en Escoce. Nous nous souffrirons a parler des Anglois et des Escots pour le present, et retournerons au jeune roy Charles de France qui de grant voulenté et a tout grant pueple s’en aloit en Allemaigne pour mettre a raison le duc de Jullers et de Guerles. SHF 3-292 sync Quant le roy de France et tout son ost eut passé la riviere de Meuse au pont a Morsay, ils prirent le chemin d’Ardenne et de la duchié de Luxembourg; et tousjours estoient les ouvriers devant, qui abattoient les bois et les buissons et faisoient les chemins unis. Moult estoient les arrois du roi de France grans et bien ordonnés. Et fort se doutoient de sa venue le duc de Juliers et ceulx de son paiis, car ils savoient bien qu’ils auroient le premier assaut. Et Juliers est un paiis qui siet en plain; et sur un jour gens d’armes l’auroient gasté et exillé tantost, excepté aucuns chastels et fortes villes qui se tiendroient mais gueres ne seroit ce pas. Le roy de France entra au paiis de Luxembourg, et vint en l’abbaye ou le duc Wincelant de Brabant fut enseveli, et la se logea deux jours. A son departement, il prit le chemin de Bastogne et s’en vint loger a une lieue pres. La duchesse de Brabant estoit logee a Bastogne et avoit sa venue signifiee au duc de Bourgongne, lequel vint la devers la duchesse et l’emmena parler au roy qui estoit logié sur les champs. Le roi de France recueillit la duchesse de Brabant moult doucement, et eurent la parlement ensemble; et puis retourna la duchesse a Bastogne, et la reconvoyerent messire Jehan de Vienne et messire Guy de la Tremoille. Et le roy alla l’endemain logier plus avant, approchant tousjours la terre de ses ennemis, et passa toute l’Ardenne. Et vint sur le point que d’entrer en Allemaigne et sur les bandes de la duchié de Juliers. Mais, avant qu’il fust venu jusques la, l’evesque Arnoul de Liege avoit esté devers le roy, et avoit moult grandement parlé en l’aide du duc de Juliers, pour briser la pointe du maltalent, que le roy et le royaulme avoient sur le duc de Juliers, qui pere estoit au duc de Guerles. Et avoit bien dit au roy et a ses oncles que, se le duc de Guerles avoit fait tant que des defiances qui leur furent envoyees en France, et qui felles et cruelles estoient et hors de rieulle, style et usage des autres defiances, que le duc de Guerles n’en avoit pas pris le conseil, ne l’avis a son pere le duc de Juliers, pourquoy il, ne son paiis ne le devoient pas comparer. Cette excusation ne suffit pas bien au roy, ne a ses oncles; et estoit l’intention du roy et de ses oncles et de son conseil aussi, que, se le duc de Juliers ne se venoit autrement excuser et luy de tous points mettre et rendre a la volonté du roy, que luy tout premier et son paiis le compareroient. Adoncques offrit l’evesque du Liege et les barons du Hasbain et les consaulx des bonnes villes qui avecques luy estoient, au roy et a ses oncles tout l’eveschié de Liege entierement, pour entrer et passer parmi et repasser, par payant leurs deniers, et pour rafreschir et eulx reposer, s’il leur plaisoit. Le roy de France les en remercia, et aussi firent ses oncles, et ne renoncerent pas a ce present, car ils ne savoient quel besoin ils en auroient. Comment le duc de Julliers et de Guerles se vint excuser des deffiances que son filz le duc de Guerles avoit envoiees au roy de France. Et devint homme du roy. Et comment plusieurs faiz d’armes furent faiz d’entre les François et Alemans devant Rencoigne. Le chapitre C LXXIIe. Or retourna l’evesque du Liege pardevers le duc de Julliers et l’arcevesque de Coulongne, et leur compta quelle chose il avoit exploittié, et sur ce orent adviz.