"de chasteaulx ainsi ordonnés en ce paiis a plusieurs, comme j’ay ouÿ recorder, et par especial tous ou la plus part des chasteaulx qui jadis furent a Regnault de Montauban sont de telle condition; car, quant luy et ses freres guerroierent au roy Charlemaine de France, ils les firent ordonner de telle fachon par le conseil de Maugis, leur cousin. Car, lorsque le roy les assiegoit par puissance et ils veoient que ils ne pouoient eschapper, ils se boutoient en ces minieres, et s’en aloient sans prendre congié." "Par ma foy," respondi messire Gaultier, "j’en prise bien l’ordonnance. Je ne sçay se je seray jamais guerroié de roy, ne de duc, ne de voisin que j’aye; mais, moy retourné en mon paiis, j’en feray faire une bonne et ample en mon fort de Passac, car il n’est point a avoir fors par famine." SHF 3-53 sync Adont fina atant leur parlement, et prindrent la saisine du chastel, et puis ordonnerent de mettre et laissier dedens gens d’armes et garnison pour le garder; et passerent oultre en intention de venir devant la ville et le chastel de Cruvalle, dont Espaignolet de Bageran estoit capitaine, et aveuc luy se tenoient grant foison de pillars et robeurs.