le savoient les Turs et les Tartres et les mescroians qui congnoissoient les proesses et les haultes emprises de luy, et pour ce pour le destruire marchanderent ils a son frere qui se nomnoit Jacquet, de luy occire et murdrir, et fist occire devant lui le gentil roy son frere gisant en son lit. Ce fut bien ennemie chose et mauvais sang de occire et murdrir si vaillant homme comme le bon roy Piettre de Chyppre, qui ne tendoit, ne ymaginoit, nuit, ne jour, autre chose fors que il peust acquitter la Sainte Terre et mettre hors des mains des mescroians. Et quant les Gennevois qui moult l’amoient (c’estoit raison, car il faisoit a amer), sceurent les nouvelles de sa mort, ils armerents sept gallees et les envoierent en Chyppre et prindrent de fait la cité de Famagouse, et le dit Jacquet dedens, et coururent une partie du roiaulme, et, se ils n’en cuidassent pis valloir, certes ils l’eussent tout destruit; mais, pour tant que les villes y sont fortes et font frontiere aux Turs, ils les laissierent es mains des hommes des lieux, excepté la cité de Famagouse, mais celle tiennent ils pour euls et la font moult bien garder. Et lorsque ils l’eurent conquise de prime face, ils en osterent si grant avoir et si grant tresor que sans nombre, pb 83 r