le tacon le craint et ne luy oseroit faire guerre; et a certaines villes et certains pors en Tartarie, qui rendent a l’Amorath Baquin grant treu tous les ans, et aussi ils sont d’une loy et ne veulent point destruire leur loy. Et la chose dont il est et a esté moult de fois esmerveillié, c’est de ce que les chrestiens guerroient et destruisent ainsi l’un l’autre, et dient entre eulx que ce n’est pas chose deue, ne raisonnable a destruire gens d’une loy et d’une foy l’un l’autre; et pour tant se est il mis en grant voulenté plusieurs fois pour venir a grosse puissance en la chrestienté et tout conquerir devant luy. Et mieulx me vaulsist assés que il m’eust acqueillié et conquis par guerre, aussi feist il a tout mon paiis, que le tacon de Tartarie." On demanda au roy d’Armenie pour quoy il luy vaulsist mieulx, et il respondi ainsi: ¶ "L’Amorath Baquin est ung sires de noble condition, et, se il estoit plus jeune trente ans que il n’est, il seroit taillié de faire plenté de moult grans conquestes la ou il se vouldroit traire; car, quant il a conquis ung paiis, ou une ville ou une seignourie, il n’en demande que l’ommaige; il laisse ceulx en leur creance, ne oncques ne bouta (ne ne fera jamais) homme