paiis et les devins d’Egypte que je doy estre roy et sire de tout le monde. Et le lieu que je verroye et ou je yroie le plus voulentiers, ce seroit a Romme, car elle est de nostre heritaige, et nos predecesseurs l’ont anciennement conquise et gouvernee par plusieurs fois, et la vueil je porter couronne, et y meneray le califfe de Baudas, le tacon de Tarterie et le souldan de Babilonne, qui me y couronneront." Ceulx respondirent, qui estoient a genouls devant l’Amorath, que ils accompliroient son desirier et son plaisir, et se partirent de luy a tout soixante mille Turs, entre lesquels il en y avoit vingt mille de tous les plus aidables et les plus preus et les mieulx armés de toute Turquie, et ceulx menoient l’avantgarde." "Tant exploittierent icelles routes de Turs qu’ils vindrent entre les montaignes de Lazara. Si ne trouverent a l’entree du paiis nul empeschement, et se bouterent ceulx de l’avantgarde dedens. Si les conduisoient le duc de Mecque et le duc de Damiette, et passa ceste avantgarde toute l’embusche du conte de Lazara. Et quant le conte et les Hongres veirent que ils en avoient leur charge, tantost pb 88 r