et ja il avoit desconfy par bataille le roy de Castille a tout grant puissance, dont il estoit plus honnouré. Si s’enclinoit le duc trop grandement a aler en Portingal, et aussi le roy d’Angleterre et son conseil luy avoit accordé; mais pour luy justement et bien infourmer de toutes ces besoingnes, de l’estat et condition du paiis, du droit de la dame madame Beatris qu’elle clamoit a la couronne de Portingal, du droit aussi du roy Jehan de Portingal, lequel les communaultés avoient couronné a roy, une fois entre les autres il avoit donné a disner au grant maistre de Saint Jaques et au dit Laurentien Fougasse de Portingal en sa chambre tout quoiement. Dont aprés disner il fist tout homme partir et appella les deux dessus dis moult amoureusement, et les mist en parole des besoignes de Portingal. Et pour tant que Laurentien Fougasse savoit parler tres bon françois et a trait, et bien luy seoit et appartenoit, le duc adrescha sa parole a luy et luy dist: "Laurentien, je vous prie que vous me comptés, tout de point en point et de membre en membre, la condition et maniere de vostre terre de Portingal, et quelles choses y sont advenues depuis que mon pb 98 r